ნინო ნიჟარაძე: ამ ეტაპზე, საწოლები საკმარისია - აჭარაში 600 საწოლია მობილიზებული

ამ ეტაპზე, საწოლები საკმარისია. აჭარაში მობილიზებულია 600 საწოლი, - ამის შესახებ აჭარის ჯანდაცვის მინისტრმა, ნინო ნიჟარაძემ აჭარის მთავრობაში გამართულ ბრიფინგზე განაცხადა.

„დილის მდგომარეობით, 510 პაციენტი გვყავს. შესაბამისად, საწოლის ბრუნვა არის დაჩქარებული, ჩვენი საკარანტინო ზონების დახმარებით, ანუ თუ საჭირო გახდა, მოხდება დამატებითი საწოლების მობილიზება, მაგრამ შემთხვევათა ნაწილი არის ბინაზე მართვადი. სავარაუდოდ, მოხდება ბინაზე მართვის პროტოკოლის ამუშავება. არ უნდა დაგვავიწყდეს, რომ ჩვენ გვყავს სხვა სომატური პაციენტებიც, რომლებიც, უბრალოდ, ქუჩაში ვერ დარჩებიან“, - განაცხადა ნინო ნიჟარაძემ.

მისივე განცხადებით, ბინაზე მართვის პროტოკოლი უკვე შემუშავებულია, თუმცა მას კლინიკური ჯგუფი აზუსტებს.

გასული დღე-ღამის განმავლობაში, კორონავირუსით ინფიცირების 193 ახალი შემთხვევიდან 92 აჭარაში დაფიქსირდა, 53 იმერეთში, 31 თბილისში, 8 სამეგრელო-ზემო სვანეთში, 7 გურიაში, 1 რაჭა-ლეჩხუმში, 1 კი მცხეთა-მთიანეთში.

დღე-ღამეში საქართველოში კორონავირუსის 193 ახალი შემთხვევა გამოვლინდა, 40 პაციენტი გამოჯანმრთელდა, ერთი კი გარდაიცვალა.

ამ დროისთვის საქართველოში კორონავირუსის 3695 შემთხვევაა დადასტურებული, გამოჯანმრთელებულია 1534 ადამიანი, 20 პაციენტი კი გარდაიცვალა.

კარანტინის რეჟიმში 4 988 ადამიანი რჩება, სტაციონარში მეთვალყურეობის ქვეშ - 836, უცხოეთიდან სამკურნალოდ გადმოყვანილია საქართველოს 41 მოქალაქე.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.