რუსეთი საქართველოს ახალი სანქციებით ემუქრება

რუსეთმა საქართველოს წინააღმდეგ შესაძლოა ახალი სანქციები აამოქმედოს. ამის შესახებ რუსეთის ფედერაციის საბჭოს თავდაცვისა და უსაფრთხოების კომიტეტის წევრმა ფრანც კლინცევიჩმა Facebook-ზე დაწერა. ინფორმაციას რუსული საინფორმაციო სააგენტო РИА ავრცელებს.

ფრანც კლინცევიჩის განცხადებით, მოსკოვი ამ ნაბიჯს გადადგამს, თუ თბილისი რუსელენოვნებთან მიმართებით დისკრიმინაციულ პოლიტიკას განაგრძობს. 

„არ გამოვრიცხავ, რომ საქართველოში ანტირუსული ისტერიის გაგრძელებამ, შესაძლოა გვაიძულოს მივიღოთ გრძელვადიანი საპასუხო ზომები, რაც ტურისტულ ემბარგოს სცდება“, - დაწერა კლინცევიჩმა Facebook-ზე.

მან ასევე კომენტარი გააკეთა საქართველოს კინოთეატრებში ფილმების რუსუელოვანი სეანსების მოხსნასთან დაკავშირებით: "როგორც ჩანს ეს არის რუსუელოვანი მაყურებლებისადმი ბოიკოტი".

20 ივნისს მართლმადიდებლობის საპარლამენტთაშორისო ასამბლეის წევრებს პარლამენტის თავმჯდომარისთვის განკუთვნილი ადგილიდან სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა, რამაც გაღიზიანება გამოიწვია და ასამბლეის მიმდინარეობა შეწყდა. ამას მოჰყვა საპროტესტო აქცია. 20 ივნისს პარლამენტის წინ სპეცრაზმმა რამდენჯერმე გამოიყენა ცრემლმდენი გაზი და რეზინის ტყვიები, ბოლოს კი საპროტესტო აქცია წყლის ჭავლით დაშალა.

მომხდარის გამო თანამდებობა პარლამენტის სპიკერმა ირაკლი კობახიძემ დატოვა. სადეპუტატო მანდატი დატოვა ასამბლეის ორგანიზატორმა ზაქარია ქუცნაშვილმა.

რუსთაველის გამზირზე აქციის მონაწილეებსა და სპეცრაზმს შორის მომხდარი დაპირისპირებისას 300-მდე ადამიანი დაშავდა, აქედან 80 პოლიციელი იყო. მათი ნაწილი სამედიცინო დაწესებულებებში ამ დრომდე მკურნალობს.

რუსეთის პრეზიდენტმა ბრძანებას მოაწერა ხელი, რომლის თანახმადაც 8 ივლისიდან რუსულ ავიაკომპანიებს საქართველოში რუსეთის მოქალაქეების გადაყვანა ეკრძალებათ. გარდა ამისა, პუტინმა რუსეთის ხელისუფლებას საქართველოში მყოფი რუსეთის მოქალაქეების სამშობლოში დაბრუნების უზრუნველყოფა დაავალა.

კინოთეატრების აფიშის ვეგვერდზე რუსულ ენაზე გახმოვანებული სეანსები აღარ არის განთავსებული. როგორც ირკვევა კინოთეატრებმა რუსულენოვან სეანსებზე უარი პარასკევიდან, 21 ივნისიდან თქვეს.