Bloomberg: ელისაბედ მეორეს Brexit-ის ჩაშლა შეუძლია

დიდი ბრიტანეთის პრემიერმინისტრობის რეალური კანდიდატი ბორის ჯონსონია. ტერეზა მეიმ ვერ მოახერხა Brexit-ის დასრულება, სწორედ ამიტომ მან 7 ივნისს პოსტი დატოვა. ახალი პრემიერის არჩევა ქვეყანაში 23 ივლისს უნდა დასრულდეს. ამის შესახებ Bloomberg-ი წერს.

გამარჯვების შემთხვევაში ყოფილი საგარეო საქმეთა მინისტრი ბორის ჯონსონი ამბობს, რომ Brexit-ის პროცესს ოქტომბრის ბოლომდე დაასრულებს, იმ შემთხვევაშიც, თუ ევროკავშირთან ახალ შეთანხმებას ან პარლამენტში მის დამტკიცებას ვერ მიაღწევს. ასეთ შემთხვევაში დიდ ბრიტანეთს ევროკავშირიდან გასვლა ბლოკთან შეთანხმების გარეშე მოუწევს, რაც ექსპერტების აზრით, ქვეყანაში ეკონომიკურ მდგომარეობას გააუარესებს. ჯონსონი დარწმუნებულია, რომ მოკლევადიანი კრიზისი სჯობს, ვიდრე ხანგრძლივი დროის განმავლობაში ევროკავშირზე დამოკიდებულება.

Bloomberg-ი წერს, რომ არსებობს ადამიანი, რომელსაც მისი შეჩერება შეუძლია და ეს დედოფალი ელისაბედ მეორეა.

ეკონომიკური კრიზისის შიშით, რომელსაც „ხისტი“ Brexit-ი გამოიწვევს, ბრიტანეთის პარლამენტის წევრები ჯონსონისთვის სერიოზული წინააღმდეგობის გაწევას აპირებენ. ისინი უნდობლობის გამოცხადებით მისთვის სამთავრობო უფლებამოსილებების ჩამორთმევას გეგმავენ. ამ გადაწყვეტილების მხარდაჭერისთვის მზადაა თავად ჯონსონის კონსერვატიული პარტიის ათზე მეტი წევრი.

ამის აღსაკვეთად, „ხისტი“ Brexit-ის მომხრეებმა მომავალ პრემიერს მოუწოდეს უბრალოდ შეაჩეროს პარლამენტის სხდომები. ასეთი შესაძლებლობა არსებობს, მაგრამ სხდომების გადადების უფლება ფორმალურად არა პრემიერმინისტრს, არამედ ბრიტანეთის მონარქს აქვს. მთავრობის ხელმძღვანელმა შესაბამისი თხოვნით დედოფალს უნდა მიმართოს (თავის მხრივ, ის ამ ნაბიჯის ინიციატორი ვერ იქნება). “

„საკითხი, რომლის შესახებაც ახლა ბრიტანული სამართლის სპეციალისტები კამათობენ - შეუძლია თუ არა სასახლეს უარი უთხრას ბორის ჯონსონს - ეს ერთგვარი ნაცრისფერი ზონაა ჩვენს [სამართლებრივ] სისტემაში“, - აცხადებს სახელმწიფო მმართვის სპეციალისტი კეტრინ ჰედონი. 

ბრიტანული კანონმდებლობის სხვა ექსპერტების აზრით, ელისაბედ მეორეს მართლაც აქვს შესაძლებლობა სხვადასხვაგვარი რეაქცია ჰქონდეს პრემიერმინისტრის პოტენციურ თხოვნაზე. „თუ გადადების თხოვნა გამოწვეულია პარლამენტში უნდობლობის გამოცხადების თავიდან აცილების სურვილით, ნდობა გარანტირებული არ არის. შესაბამისად, დედოფალს შეუძლია მიმართოს პრემიერმინისტრს დასაბუთებული თხოვნით გადახედოს ან გაიწვიოს მოთხოვნა“ - აღნიშნავენ ექსპერტები.

გარდა ამისა, დედოფალს შეუძლია პაუზა აიღოს, განაცხადოს რა, რომ მას საიდუმლო საბჭოსთან (მოქმედი და ყოფილი მინისტრებისგან შემდგარი ცერემონიული ორგანო), რაც პარლამენტს მისცემდა დროს, რომ მათ მთავრობის ხელმძღვანელს უნდობლობა გამოუცხადონ და სხდომების გადადებას აქტუალობა დაუკარგონ. 

სამეფო ბიოგრაფმა ჰიუგო ვიკერსმა განაცხადა, რომ ბუკინგემის სასახლე უკვე დაუკავშირდა ჩინოსნებს პრემიერის შესაძლო მოთხოვნის განსახილველად. „ეს დედოფალს უკიდურესად რთულ მდგომარეობაში აყენებს“, - დასძენს იგი.

თავად ელისაბედ მეორის დამოკიდებულება Brexit-ის მიმართ, დაზუსტებით უცნობია. 2016 წელს კერძო საუბარში წარმოთქმულმა მისმა არაერთაზროვანმა პასუხმა ბრიტანულ პრესაში სერიოზული კამათი გამოიწვია.

ტერეზა მეის თანამდებობიდან გადადგომის შესახებ ინფორმაცია მაისში გავრცელდა. დიდი ბრიტანეთის მთავრობის მეთაურის პოსტი მან 2016 წელს, დევიდ ქემერონის გადადგომის შემდეგ დაიკავა. დიდ ბრიტანეთში პოლიტიკური კრიზისი Brexit-მა გამოიწვია.