ტრამპმა თურქეთი სირიაში დაწყებული ოპერაციის გამო გააკრიტიკა

აშშ-ის პრეზიდენტმა, დონალდ ტრამპმა თურქეთი სირიაში ოპერაცია „მშვიდობის წყაროს“ დაწყების გამო გააკრიტიკა. ამის შესახებ Reuters-ი წერს. 

გამოცემის ინფორმაციით, თეთრი სახლის მიერ გავრცელებულ ოფიციალურ განცხადებაში ტრამპმა ხაზგასმით აღნიშნა, რომ აშშ ამ თავდასხმას მხარს არ უჭერს და თურქეთს მიანიშნა, რომ ეს ოპერაცია ცუდი იდეაა. 

ტრამპმა ასევე დასძინა, რომ ვაშინგტონი ყველაფერს გააკეთებს იმისთვის, რომ თურქეთმა თავისი ვალდებულებები შეასრულოს და რეგიონში ჰუმანიტარული კრიზისი არ შექმნას. 

მანამდე ოპერაციის დაყწებას ევროკომისიის პრეზიდენტი და ნატოს გენერალური მდივანი გამოეხმაურნენ.

თურქეთმა სირიის ტერიტორიაზე ოპერაცია „მშვიდობის წყარო“ 9 ოქტომბერს დაიწყო. აშშ-მა სირიიდან ჯარის გაყვანა 7 ოქტომბერს დაიწყო,  მას შემდეგ, რაც თურქეთმა სირიაში ანტიტერორისტული ოპერაციის დაწყების შესახებ განაცხადა. ქურთებმა ვაშინგტონის ეს გადაწყვეტილება „ზურგში დანის ჩარტყმად“ აღიქვეს, თუმცა ტრამპმა განაცხადა, რომ ვაშინგტონმა ქურთები არ მიატოვა და თურქეთს საბრძოლო მოქმედებების დაწყების შემთხვევაში ეკონომიკის განადგურებით დაემუქრა.