რუსეთი ირწმუნება, რომ იდლიბის პროვინციაში „თეთრმა ჩაფხუტებმა“ ქიმიური იარაღი შეიტანეს

რუსეთის თავდაცვის სამინისტროს წარმომადგენლის, ალექსეი ციგანკოვის განცხადებით, "თეთრი ჩაფხუტების" წარმომადგენლებმა იდლიბის პროვინციაში მდებარე ერთ-ერთ საწყობში ქიმიური იარაღი მიიტანეს. მისი თქმით, ქიმიური იარაღი საწყობში დაჯგუფება "აჰრარ აშ-შამის" მეშვეობით შეიტანეს. ინფორმაციას რუსული მედია ავრცელებს.

რუსეთის თავდაცვის უწყების ცნობით, ამის შემდეგ ტვირთი პროვინციის სამხრეთ ნაწილში გადაიტანეს, რათა ქიმიური იარაღით თავდახსმის ინსცენირება მოახდინონ და შემდეგ ეს სირიის სამთავრობო ძალებს დააბრალონ.

25 აგვისტოს მედიაში დაიწერა, რომ ოფიციალური ვაშინგტონი მოსკოვს აფრთხილებს. Bloomberg-ის ინფორმაციით, იმ შემთხვევაში, თუ ასადის რეჟიმი ქიმიურ იარაღს ისევ გამოიყენებს, ამერიკის შეერთებული შტატები სირიაზე იერიშს მიიტანს.

რუსეთის თავდაცვის სამინისტრომ კი 26 აგვისტოს განაცხადა, რომ მომდევნო ორი დღის განმავლობაში სირიის პროვინცია იდლიბში, შვიდობიან მოქალაქეებზე იმიტირებული ქიმიური თავდასხმა მოხდება, ხოლო ამ გარემოებას აშშ სირიაზე იერიშის მისატანად გამოიყენებს.

27 აგვისტოს რუსულ მედიაში დაიწერა, რომ რუსეთმა თავისი სამხედრო-საზღვაო ფლოტი ხმელთაშუა ზღვაში, სირიის სანაპიროებთან, 10 ხომალდითა და ორი წყალქვეშა ნავით გააძლიერა. რვა გემი აღჭურვილია უპილოტო საკრუიზო რაკეტა "კალიბრით". პუბლიკაციის თანახმად, სირიის სანაპიროებზე კიდევ რამდენიმე ხომალდი მიემართება. 

ამასთან, რუსეთის თავდაცვის მინისტრმა აშშ-ს სირიასთან ახლოს სარაკეტო კომპლექსების რაოდენობის გაზრდასა და სამხედრო მობილიზებაში დასდო ბრალი, რასაც პენტაგონმა პროპაგანდისტული ინფორმაცია უწოდა. 

14 აპრილს, ამერიკის შეერთებულმა შტატებმა, დიდმა ბრიტანეთმა და საფრანგეთმა სარაკეტო იერიში მიიტანეს დამასკოსა და ჰომსის პროვინციაზე. ეს იყო კოალიციის პასუხი სირიის დედაქალაქის შემოგარენში, დუმაზე მიტანილ ქიმიურ შეტევაზე, რაშიც ისინი ასადის სამხედროებს ადანაშაულებენ.

სირიის ხელისუფლება უარყოფს ქიმიური იარაღის გამოყენებას და აცხადებს, რომ თავდასხმა გაყალბებულია. რუსეთის პრეზიდენტმა ვლადიმერ პუტინმა სირიაში განხორციელებული სარაკეტო იერიში დაგმო.