ტრამპმა სი ძინპინთან შეიძლება აღარ იმეგობროს

აშშ-ის პრეზიდენტმა დონალდ ტრამპმა განაცხადა, რომ ჩინეთის სახალხო რესპუბლიკის ლიდერთან სი ძინპინთან შესაძლოა აღარ იმეგობროს. ამის შესახებ ინფორმაციას Bloomberg-ი ავრცელებს. 

„შესაძლოა, რომ ის ჩემი მეგობარი აღარ იყოს“, - უპასუხა მან ჟურნალისტის კითხვას. ეს ტრამპმა მას შემდეგ თქვა, რაც გაეროს სხდომაზე ჩინეთი აშშ-ის შუალედურ არჩევნებში ჩარევის მცდელობაში დაადანაშაულა.

გუშინ ტრამპმა განაცხადა, რომ პეკინს კონგრესის შუალედურ არჩევნებში ჩარევის მცდელობა ჰქონდა.  აშშ-ის ლიდერის თქმით, ჩინეთს სურს რესპუბლიკურმა პარტიამ არ გაიმარჯვოს, ამის მიზანი კი იმ სავაჭრო პოლიტიკის გადახედვაა, რომელსაც დღეს ტრამპის ადმინისტრაცია ატარებს.

აშშ-სა და ჩინეთს შორის სავაჭრო ომმა პიკს მიაღწია. აშშ-ის მიერ ჩინეთისთვის დაწესებული 200 მილიარდი  დოლარის ღირებულების ჩინურ პროდუქციაზე 10%-იანი ტარიფები დღეიდან ამოქმედდება.

22 სექტემბერს ჩინეთმა სავაჭრო საკითხებთან დაკავშირებით აშშ-სთან მოლაპარაკებებზე უარი თქვა.  ვაშინგტონში აცხადებენ, რომ თუ პეკინი საპასუხო ზომებს მიიღებს, ჩინეთის წინააღმდეგ 267 მილიარდი დოლარის ღირებულების პროდუქციაზე დამატებითი ტარიფები დაწესდება.

8 აგვისტოს აშშ-მა 279 დასახელების პროდუქტის სია (16 მილიარდი დოლარის ოდენობის) გამოაქვეყნა, რომელთა მიმართ 23 აგვისტოდან 25%-იანი საბაჟო ტარიფი ამოქმედდა. 8 აგვისტოს ჩინეთმა აშშ-ს საპასუხო ტარიფები დაუწესა.

შეერთებულ შტატებსა და ჩინეთს შორის სავაჭრო ურთიერთობები მიმდინარე წელს მას შემდეგ გამწვავდა, რაც გამოძიებამ დაადგინა, რომ ZTE-ის თანამშრომლები ამერიკულ საქონელს ირანში არალეგალურად ყიდდნენ, რის შედეგადაც კომპანიამ ჯარიმის სახით 890 მილიონი დოლარი გადაიხადა.

2018 წლის ნოემბერში აშშ-ში შუალედური არჩევნები ტარდება, რომელზეც სრულად გადაირჩევენ აშშ-ის წარმომადგენლობით პალატას, ასევე სენატორების მესამედს. გარდა ამისა, 39 შტატში ახალ გუბერნატორებს აირჩევენ.

უფრო დეტალურად ამერიკის შეერთებული შტატების შუალედურ არჩევნებზე ინფორმაცია შეგიძლიათ წაიკითხოთ ბმულზე.