ტრამპმა ჩინეთს აშშ-ის კონგრესის არჩევნებში ჩარევის მცდელობაში დასდო ბრალი

დონალდ ტრამპი ოფიციალურ პეკინს კონგრესის შუალედურ არჩევნებში ჩარევის მცდელობაში ადანაშაულებს. აშშ-ის ლიდერის თქმით, ჩინეთს სურს რესპუბლიკურმა პარტიამ არ გაიმარჯვოს, ამის მიზანი კი იმ სავაჭრო პოლიტიკის გადახედვაა, რომელსაც დღეს ტრამპის ადმინისტრაცია ატარებს. ამის შესახებ Reuters-ი წერს.

ეს განცხადება აშშ-ის პრეზიდენტმა გაეროს 73-ე ასამბლეაზე სიტყვით გამოსვლისას გააკეთა, სადაც ასევე რამდენიმე მნიშვნელოვან საკითხსაც შეეხო.

აშშ-სა და ჩინეთს შორის სავაჭრო ომმა პიკს მიაღწია. აშშ-ის მიერ ჩინეთისთვის დაწესებული 200 მილიარდი  დოლარის ღირებულების ჩინურ პროდუქციაზე 10%-იან ტარიფები დღეიდან ამოქმედდება.

22 სექტემბერს ჩინეთმა სავაჭრო საკითხებთან დაკავშირებით აშშ-სთან მოლაპარაკებებზე უარი თქვა.  ვაშინგტონში აცხადებენ, რომ თუ პეკინი საპასუხო ზომებს მიიღებს, ჩინეთის წინააღმდეგ 267 მილიარდი დოლარის ღირებულების პროდუქციაზე დამატებითი ტარიფები დაწესდება.

8 აგვისტოს აშშ-მა 279 დასახელების პროდუქტის სია (16 მილიარდი დოლარის ოდენობის) გამოაქვეყნა, რომელთა მიმართ 23 აგვისტოდან 25%-იანი საბაჟო ტარიფი ამოქმედდა. 8 აგვისტოს ჩინეთმა აშშ-ს საპასუხო ტარიფები დაუწესა.

შეერთებულ შტატებსა და ჩინეთს შორის სავაჭრო ურთიერთობები მიმდინარე წელს მას შემდეგ გამწვავდა, რაც გამოძიებამ დაადგინა, რომ ZTE-ის თანამშრომლები ამერიკულ საქონელს ირანში არალეგალურად ყიდდნენ, რის შედეგადაც კომპანიამ ჯარიმის სახით 890 მილიონი დოლარი გადაიხადა.

2018 წლის ნოემბერში აშშ-ში შუალედური არჩევნები ტარდება, რომელზეც სრულად გადაირჩევენ აშშ-ის წარმომადგენლობით პალატას, ასევე სენატორების მესამედს. გარდა ამისა, 39 შტატში ახალ გუბერნატორებს აირჩევენ.

უფრო დეტალურად ამერიკის შეერთებული შტატების შუალედურ არჩევნებზე ინფორმაცია შეგიძლიათ წაიკითხოთ ბმულზე.