რა წერია სკრიპალების შესახებ წიგნში, რომელიც BBC-ის ჟურნალისტმა დაწერა

BBC-ის კორესპონდენტის მარკ ურბანის ახალ წიგნში "გრუ"-ს ყოფილი აგენტის, პოლკოვნიკ სერგეი სკრიპალის შესახებ, სოლსბერიში ნოვიჩოკით მოწამვლამდე და მოწამვლის შემდეგ ცხოვრების აქამდე უცნობ დეტალებზე წერია. წიგნის თანახმად, ასევე არსებობდა სხვა გადაბირებული რუსი აგენტების ლიკვიდაციის გეგმებიც.

BBC-ის რუსულ გამოცემასთან ინტერვიუში მარკ ურბანი ყოფილ ორმაგ აგენტთან შეხვედრისა და მისი ცხოვრებისეული შეხედულებების შესახებ საუბრობს.

ურბანის თქმით, თავად მას სერგეი სკრიპალთან 2017 წლის აგვისტოს შემდეგ პირადად აღარ უსაუბრია. ჟურნალისტი აქვე აზუსტებს ერთ დეტალს: "ყველას ჰგონია, რომ მოწამვლის შემდეგ, სკრიპალები თითქოს იზოლირებულად, როგორც საკანში ისე ცხოვრობენ. ეს ასე არ არის! ისინი უკავშირდებიან ადამიანებს სოციალური ქსელებით, ელექტრონული ფოსტით. ზოგი მათგანი ესტუმრა კიდეც სკრიპალებს", - ამბობს მარკ ურბანი და დასძენს, რომ ივნისში იულია სკრიპალთან მეგობარი ჩავიდა რუსეთიდან: "ასე, რომ სკრიპალები მეგობრებს ხვდებიან, მათ უბრალოდ ჩვენი - ჟურნალისტების ნახვა არ სურთ".

ურბანი ინტერვიუში ამბობს, რომ სერგეი სკრიპალს ძალიან უყვარდა რუსული საზოგადოებრივი არხის ყურება, რადგან ის "გულის სიღრმეში თავს გამყიდველად არ თვლის. თავის შეხედულებებში ის რუსეთის ერთგული დარჩა", - აცხადებს წიგნის ავტორი.

წიგნში ყირიმის ანექსიის შესახებ სერგეი სკრიპალის მოსაზრებებიც წერია. როგორც ურბანი ამბობს, სკრიპალს მიაჩნია, რომ რუსეთის გარეშე უკრაინელები მართვას ვერ შეძლებენ, რომ ამისთვის უკრაინას აუცილებლად სჭირდება გვერდით რუსეთის დგომა. 

მარკ ურბანის თქმით, სერგეი სკრიპალი ორმაგ აგენტობას როგორც ბიზნესს, ისე უყურებდა: "მე მომეჩვენა, რომ სერგეი სკრიპალი დაზვერვის საქმიანობას როგორც ბიზნესს ისე უყურებდა. როდესაც მან დიდი ბრიტანეთისთვის ინფორმაციის გადაცემის გადაწყვეტილება მიიღო, მიხვდა, რომ ის გარკვეულ ბიზნესში შედიოდა", - ამბობს წიგნის ავტორი. 

მარკ ურბანის თქმით, სკრიპალი თავისი ეპოქის ტიპური სამხედრო ადამიანია: "ადამიანი, რომელმაც გაირა მძიმე საწვრთნელი მომზადება საჰაერო სადესანტო ძალებში, ცენტრალურ აზიასა და "გრუში" მსახურობის დროს. სერგეი მკაცრი ადამიანია. მას აქვს გარკვეული ფიზიკური დისციპლინა, ის მოკრივე იყო. მას აქვს ძალა - ფიზიკური და ინტელექტუალური. ის ძალიან ამაყობს იმით, რაც გააკეთა, როგორც ჯარის კარიერით, ასევე ბრიტანეთისთვის მსახურებით. სხვათა შორის, ვფიქრობ, რომ ერთ-ერთი მიზეზი, რატომაც დათანხმდა ჩემთან ინტერვიუს ის იყო, რომ ამ თემებზე ესაუბრა", - ამბობს მარკ ურბანი.

5 სექტემბერს დიდი ბრიტანეთის პროკურატურამ და სკოტლენდ იარდმა სერგეი სკრიპალისა და მისი შვილის მოწამვლაში ეჭვმიტანილების ვინაობა დაასახელა. ესენი არიან რუსლან ბოშიროვი და ალექსანდრ პეტროვი. დიდი ბრიტანეთის პრემიერმა განაცხადა, რომ ისინი რუსეთის სამხედრო დაზვერვაში მუშაობენ. ასევე  სკრიპალების მოწამვლაში ეჭვმიტანილი მესამე პირის ვინაობა დაადგინეს. მოგვიანებით ბოშიროვის შესახებ დეტალები გახდა ცნობილი. გამოძიების თანახმად, მას ანატოლი ჩეპიგა ჰქვია.

კრემლში კი აცხადებენ, რომ სკრიპალების მოწამვლაში ეჭვმიტანილზე არაფერი იციან.

რუსეთის დაზვერვის ყოფილი თანამშრომელი სერგეი სკრიპალი და მისი ქალიშვილი იულია დიდ ბრიტანეთში, სოლსბერიში ნერვული აგენტი "ნოვიჩოკით" მოწამლეს. სკრიპალები სიკვდილს გადაურჩნენ, თუმცა, ექიმების მეთვალყურეობის ქვეშ რჩებიან. სკრიპალების მოწამვლას თანამედროვე პოლიტიკის ისტორიაში ყველაზე დიდი დიპლომატიური დაპირისპირება მოჰყვა.