მედია: ბრიტანეთის ტერიტორიაზე ორი ადამიანის მკვლელობასთან შესაძლოა რუსეთს ჰქონდეს კავშირი

დიდი ბრიტანეთის პოლიცია ეჭვობს, რომ ბრიტანეთის ტერიტორიაზე ორი ადამიანის მკვლელობასთან შესაძლოა რუსეთს ჰქონდეს კავშირი. ამის შესახებ Times-ი წერს.

ლაპარაკია ბიზნესმენების ალექსანდრე პერეპელიჩნისა და სკოთ იანგის გარდაცვალებაზე. 

პერიპილიჩნი იყო სერგეი მაგნიტსკის სიკვდილის საქმეზე ფონდ Hermitage Capital-ის მთავარი მოწმე. მან ჩვენებები მისცა რიგი რუსი ბიზნესმენებისა და ჩინოვნიკების წინააღმდეგ, ვისაც კორუფციაში და საბიუჯეტო თანხების მოპარვაში ადანაშაულებდნენ. 2009 წელს ბრიტანეთმა მას და მის ოჯახს პოლიტიკური დევნილის სტატუსი მიანიჭა და იგი ოჯახთან ერთად საცხოვრებლად ლონდონში გადავიდა.2012 წლის ნოემბერში საღამოს სარბენად გამოსული პერიპილიჩნი ქუჩაში გულის შეტევისგან გარდაიცვალა. ექსპერტიზამ ორგანიზმში აღმოაჩინა იშვიათი მცენარისგან დამზადებული შხამი. 

სკოტ იანგი ბრიტანელი ბიზნესმენი და ბორის ბერეზოვკის საქმიანი პარტნიორი იყო. პრესაში გავრცელებული ინფორმაციის თანახმად, სწორედ იანგი ეხმარებოდა ბერეზოვსკის რუსეთიდან ფინანსების გამოტანაში. იგი წლების განმავლობაში აქტიურად თანამშრომლობდა რუსეთიდან ბრიტანეთში გაქცეულ ბიზნესმენებთან.

2017 წლის 8 დეკემბერს იანგი თავის მეგობრის ბინის ფანჯრიდან გადავარდა და დაიღუპა.

სკოტლანდ იარდის ოფიცრებს, რომლებიც გამოძიებას აწარმოებენ, გააჩნიათ მტკიცებულება, რომ რუსეთის „ГРУ“-ს აგენტები დიდ ბრიტანეთში საეჭვო გარდაცვალებების მომენტში ჩნდებოდნენ.

8 ოქტომბერს ცნობილი გახდა, რომ სკრიპალების მოწამვლაში მეორე ბრალდებულის ალექსანდრე პეტროვის ნამდვილი სახელი და გვარი ალექსანდრე მიშკინია.  26 სექტემბერს Bellingcat-ის და The Insider-ის გამოძიების მესამე ნაწილის თანახმად ცნობილი გახდა, რომ სკრიპალების თავდასხმაში ბრალდებული რუსლან ბოშიროვის ნამდვილი სახელია ანატოლი ჩეპიგაა.

რუსეთის „გრუ"-ს ყოფილი თანამშრომელი სერგეი სკრიპალი და მისი ქალიშვილი იულია სოლსბერიში ნერვული აგენტი "ნოვიჩოკით" მოწამლეს. სკრიპალები სიკვდილს გადაურჩნენ, თუმცა, ექიმების მეთვალყურეობის ქვეშ რჩებიან. სკრიპალის მოწამვლას თანამედროვე პოლიტიკის ისტორიაში ყველაზე დიდი  დიპლომატიური  დაპირისპირება მოჰყვა.

5 სექტემბერს დიდი ბრიტანეთის პროკურატურამ და სკოტლენდ იარდმა სერგეი სკრიპალისა და მისი შვილის მოწამვლაში ეჭვმიტანილების ვინაობა დაასახელა. დიდი ბრიტანეთის პრემიერის განცხადებით, ისინი რუსეთის სამხედრო დაზვერვაში მუშაობენ.