ანა დოლიძე: საფუძველს მოკლებულია არგუმენტი, რომ უზენაეს სასამართლოს მოსამართლეები აკლია

იუსტიციის უმაღლესი საბჭოს არამოსამართლე წევრი ანა დოლიძე დეპუტატ მამუკა მდინარაძის განცხადების საპასუხოდ აცხადებს, რომ მმართველი პარტიის არგუმენტი, თითქოს უზენაეს სასამართლოს აკლია მოსამართლეები და ამიტომ "რეაქტიული სიჩქარით უნდა მივიღოთ ეს პროექტი, საფუძველს მოკლებულია". ამის შესახებ დოლიძემ იუსტიციის საბჭოში განაცხადა, სადაც სხდომა გაიმართება.

ანა დოლიძის განცხადებით, ის, რომ პარლამენტის იურიდიული კომიტეტი არ ელოდება ვენეციის კომისიის დასკვნას და მანამდე იღებს კანონპროექტს მეორე მოსმენით, იმაზე მიუთითებს, რომ ის უფრთხის ვენეციის კომისიის პოზიციებს.

"სინამდვილეში, არგუმენტი, რომ უზენაეს სასამართლოს აკლია მოსამართლეები და ამიტომ რეაქტიული სიჩქარით უნდა მივიღოთ ეს პროექტი, რა თქმა უნდა, საფუძველს მოკლებულია, იმიტომ რომ პარლამენტის წინაშე 2016 წლიდან წარდგენილია სამი კანდიდატურა: ნონა თოდუა, თამარ ლალიაშვილი, ლევან ბოძაშვილი. ჯერ თუ ასე ეჩქარებოდა საქართველოს პარლამენტს ამ ადამიანებისთვის უნდა ეყარათ კენჭი და არ მოეხდინათ მათი იგნორი, შემდეგ უნდა ეზრუნათ დანარჩენ კანდიდატურებზე. ფაქტია, რომ მოხდა იურიდიულად გამართულად წარდგენილი ადამიანების სახელების და გვარების იგნორირება. თითიდან გამოწოვილია ის წუხილი, რომ უზენაესი სასამართლო დაიშლება დაინგრევა იმ შემთხვევაში თუ კანონს დროზე არ მივიღებთ. უმრავლესობა იქცევა ლაჩრულად, როდესაც, ერთი მხრივ, აგზავნის მოსაზრებებისთვის მოთხოვნას ვენეციის კომისიაში და, მეორე მხრივ, არც ელოდება ამ მოსაზრებებს და წინასწარ იღებს კანონპროექტს.

მათ არ უნდათ მარგველაშვილის ან ვინმეს მიერ წარდგენილი მოსამართლეები, მათ უნდათ საკუთარი მოსამართლეები. ამიტომ მოხდა ამ სამი კანდიდატურის იგნორირება, ამიტომ ხდება უსწრაფესი წესით ამ კანონის მიღება, რომ მურუსიძე-ჩინჩალაძემ კობახიძის გაფორმებით დანიშნონ თავისი ხალხი", - განაცხადა ანა დოლიძემ.

უზენაესი სასამართლოს მოსამართლეთა შერჩევის შესახებ ფრაქცია „ქართული ოცნების“ მიერ მომზადებულ კანონპროექტს საქართველოს პარლამენტის იურიდიულ საკითხთა კომიტეტი მეორე მოსმენით განიხილავს. სხდომა ხმაურის ფონზე მიმდინარეობს. სხდომაზე მამუკა მდინარაძემ განაცხადა, რომ პრობლემაა უზენაეს სასამართლოში 7 მოსამართლის დარჩენა. დამოუკიდებელმა დეპუტატმა ეკა ბესელიამ სხდომა პროტესტის ნიშნად დატოვა.

ვენეციის კომისია საქართველოს უზენაესი სასამართლოს მოსამართლეების არჩევის წესთან დაკავშირებით დასკვნას ხვალ გამოაქვეყნებს. ამ საკითხზე დღეს განცხადება გაავრცელა ომბუდსმენმა და პარლამენტში მოსამართლეების საკითხზე მოხსენებით გამოსვლა მოითხოვა. 

20 მარტს უზენაესი სასამართლოს მოსამართლეების არჩევის წესთან დაკავშირებით უმრავლესობის მიერ მომზადებულ კანონპროექტს პირველი მოსმენით მხარი დაუჭირეს.

21 იანვარს უზენაესის მოსამართლეობის სადავო კანდიდატებმა მოსამართლეებად არჩევაზე უარი თქვეს. 

10 მთავარი პრინციპი, რომელსაც მოსამართლეების დანიშვნაზე უმრავლესობის პროექტი ეფუძნება, შეგიძლიათ იხილოთ ბმულზე.