გორში რუსი დეპუტატების წინააღმდეგ აქცია გაიმართა

"არა ოკუპაციას! არა გავრილოვის ვიზიტს საქართველოში!" - ამ ლოზუნგებით გორში სამოქალაქო აქტივისტებმა საქრთველოში რუსი პოლიტიკოსის, სერგეი გავრილოვის ჩამოსვლა და პარლამენტში ვიზიტი გააპროტესტეს.

აქტივისტები სიმბოლურად გორში, ჭავჭავაძის გამზირზე იმ შენობასთან შეიკრიბებიან, რომელიც ერთ-ერთი პირველი დაიბომბა 2008 წელს რუსული ავიაციის მხრიდან და სადაც ჭურვების ნამსხვრევებისგან მიღებული ნაკვალევი დღესაც ჩანს.

მათი განცხადებით, ის, რაც დღეს მოხდა მიუღებელი და შეურაცხყმყოფელია და საქართველოს ხელისუფლებას ამაზე სათანადო რეაგირება უნდა ჰქონდეს. აქტივისტთა ნაწილი გორიდან თბილისში გაემგზავრა, სადაც 19:00 საათზე აქციაა დაგეგმილი.

სასტუმრო "რედისონი" რუსეთის დელეგაციამ, მათ შორის სერგეი გავრილოვმა დატოვა. დელეგაცია შენობიდან პოლიციის დახმარებით გაიყვანეს, რადგან გარეთ მათ აქციის მონაწილეები ელოდებოდნენ. არსებული ინფორმაციით, აქციის მონაწილეებმა რუსი დეპუტატების მიმართულებით კვერცხები და ბოთლები ისროლეს.

დღეს საპროტესტო აქცია გაიმართა თელავში, ქუთაისსა და ბათუმშიც.

ცოტა ხნის წინ სასტუმროსთან მოქალაქეების ერთი ნაწილი მეორეს დაუპირისპირდა, იყო სიტყვიერი დაპირისპირება და წყლის ბოთლის სროლის ფაქტიც. 

პარლამენტის სპიკერისთვის განკუთვნილი ადგილიდან, დელეგატებს ასამბლეის პრეზიდენტმა, რუსეთის დუმის კომუნისტური პარტიის წევრმა სერგეი გავრილოვმა მიმართა და "ქართული ოცნების" წევრ ზაქარია ქუცნაშვილს მოწვევისთვის მადლობა გადაუხადა.

პარლამენტში მომხდარ ინციდენტთან დაკავშირებით ცოტა ხნის წინ ბაქოდან კომენტარი ირაკლი კობახიძემ გააკეთა.

საპარლამენტო ოპოზიცია ირაკლი კობახიძის პასუხისმგებლობის საკითხის დაყენებას და მის გადადგომას მოითხოვს. 

პარლამენტში მომხდართან დაკავშირებით განცხადება გაავრცელა ბიძინა ივანიშვილმა და პრემიერმა მამუკა ბახტაძემ, ასევე განცხადება გააკეთეს ირაკლი ღარიბაშვილმა და კახა კალაძემ. 

პარლამენტში მართლმადიდებლობის საპარლამენტთაშორისო ასამბლეის მიმდინარეობა შეწყდა. ზაქარია ქუცნაშვილმა კი მოიბოდიშა და თქვა, რომ ასამბლეის ჩასატარებლად არასწორი ადგილი შეარჩიეს.

მომხდარ ფაქტს გამოეხმაურა საქართველოს პრეზიდენტი სალომე ზურაბიშვილი, თამარ ჩუგოშვილი, არჩილ თალაკვაძე. რუსი დეპუტატის ქცევა "ევროპული საქართველოს" წევრებმაც გააპროტესტეს და მათ სპიკერატის ადგილი დაიკავეს.

თბილისი მართლმადიდებლობის საპარლამენტთაშორისო ასამბლეას მასპინძლობს. ღონისძიებაზე 25 ქვეყნის დელეგაციების წარმომადგენლები არიან ჩამოსულები.

მართლმადიდებლობის საპარლამენტთაშორისო ასამბლეის თავმჯდომარე სერგეი გავრილოვი, რომლის გამოჩენასაც საქართველოს პარლამენტში ვნებათაღელვა მოჰყვა, რუსეთის სახელმწიფო დუმაში კომუნისტურ პარტიას წარმოადგენს. ის რუსეთის პარლამენტის მეხუთე (2007), მეექვსე (2011) და მეშვიდე (2016-დან) მოწვევების წევრია.

მედიაში ვრცელდება ინფორმაცია, რომ გავრილოვი აფხაზეთის ომში სეპარატისტების მხარეს იბრძოდა, რასაც რუსი დეპუტატი კატეგორიულად უარყოფს. ასევე ვრცელდება ინფორმაცია, რომ გავრილოვი ნამყოფია დნესტრისპირეთში, კოსოვოსა და სირიაში, სადაც ასევე რუსეთის საპარლამენტო დელეგაციების შემადგენლობაში ჩადიოდა.

გავრილოვი ასევე არის ორგანიზაცია „საიმპერატორო მართლმადიდებლური პალესტინის საზოგადოების“ საბჭოს წევრი. აღსანიშნავია, რომ „საიმპერატორო მართლმადიდებლური პალესტინის საზოგადოების“ თავმჯდომარე გენერალ-პოლკოვნიკი, რუსეთის ყოფილი შს მინისტრი და პრემიერმინისტრი სერგეი სტეპაშინია.