ბარამიძე: პარლამენტში შეჭრაზე გადაწყვეტილება არ ყოფილა მიღებული, ხალხმა ეს სპონტანურად გააკეთა

„პარლამენტში შეჭრაზე გადაწყვეტილება არ ყოფილა მიღებული. ხალხმა ეს სპონტანურად თვითონ გააკეთა. ხალხი არის გაბრაზებული და ერთობლივი გადაწყვეტილება არავის მიუღია. ჩვენ ვცდილობდით, რომ ხალხი დაგვეშოშმინებინა. ხალხი არის ძალიან გაბრაზებული. ხალხი გია ბარამიძეს, „ნაციონალურ მოძრაობას“ და „ევროპულ საქართველოს“ არ მოუყვანია. ჩვენ ყველანი მოვედით ჩვეულებრივი მოქალაქეები. არ გავჩერდებით, ვაპირებთ კონსტიტუციური, მშვიდობიანი და კანონით დაშვებული გზის გამოყენებას“-ეს განცხადება „ნაციონალური მოძრაობის“ ერთ-ერთმა ლიდერმა გიორგი ბარამიძემ ტელეკომპანია „იმედის“ პირდაპირ  ეთერში გააკეთა.

მისი თქმით, ხალხს უნდოდა საქართველოს პარლამენტში შესვლა: „იმისთვის, რომ ის უწმინდურობა გაიწმინდოს. რუსის დროშა რომ დაგვახურეს თავზე. პუტინის საცეცი და მეტასტაზი რომ დაგვასვეს თავზე. საქართველოს პარლამენტში რომ ჩვეულებრივი ადამიანები შევიდნენ, რამე დაემართება ამ პარლამენტს? იმაზე უარესი, ვიდრე გავრილოვი იყო შესული?“, - განაცხადა ბარამიძემ. 

რაც შეეხება პოლიტიკური პასუხისმგებლობის საკითხს, გიორგი ბარამიძის განცხადებით, „ნაციონალური მოძრაობა“ ხალხის გვერდზე იდგება:  

„ჩვენი პასუხისმგებლობა არის ის, რომ ვიყოთ ხალხთან ერთად და არ მოვცილდეთ ხალხს. ჩვენ ვართ მოქალაქეები, მაგრამ ამავდროულად გვაქვს სხვა პასუხისმგებლობა. როგორც პოლიტიკური ორგანიზაციის წევრებს. ვეცდებით, მშვიდობიანად წარიმართოს პროცესები, მაგრამ ეს ხელისუფლება აღარ და ვეღარ დარჩება, ბოლომდე ჩამოიხადა ნიღაბი“, - განაცხადა ბარამიძემ.  

მისი თქმით, ეს არ არის პარტიული აქცია: „აქ მოვიდნენ ჩვეულებრივი ქართველი მოქალაქეები ვინც შეურაცხყოფილად იგრძნო თავი ამ მოღალატური ნაბიჯის გამო. ამაზე მეტი მორალურად, ემოციურად სიმბოლურად რა შეურაცხოფა უნდა მიაყენოს ქართულ სახელმწიფოს ივანიშვილმა? პირდაპირ პუტინი უნდა მოეყვანა და დაესვა საქართველოს პარლამენტის დარბაზში?“, - განაცხადა ბარამიძემ. 

პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა. 

ბოლო ინფორმაციით, რუსთაველის გამზირზე მიმდინარე მოვლენების შედეგად აქციის 14 მონაწილე და 38 სამართალდამცველი დაშავდა. თბილისის სასწრაფო სამედიცინო დახმარების სამსახურის ინფორმაციით, აქციის 4 მონაწილეს საშუალო სიმძიმის დაზიანება აქვს, ხოლო 10 მსუბუქად დაშავდა. დაშავებულებიდან სამს ინგოროყვას კლინიკაში ოპერაციას უკეთებენ. 

ცრემლმდენი გაზის გაშვებამდე შინაგან საქმეთა სამინისტრომ აქციის მონაწილეების მიმართ გაფრთხილება გაავრცელა. 

პარლამენტში იმყოფება პრემიერი მამუკა ბახტაძე, შს მინისტრი გიორგი გახარია.

რუსეთის დელეგაციამ, მათ შორის სერგეი გავრილოვმა საქართველო დატოვა.  პარლამენტის სპიკერისთვის განკუთვნილი ადგილიდან, დელეგატებს ასამბლეის პრეზიდენტმა, რუსეთის დუმის კომუნისტური პარტიის წევრმა სერგეი გავრილოვმა მიმართა და "ქართული ოცნების" წევრ ზაქარია ქუცნაშვილს მოწვევისთვის მადლობა გადაუხადა.

საპარლამენტო ოპოზიცია ირაკლი კობახიძის პასუხისმგებლობის საკითხის დაყენებას და მის გადადგომას მოითხოვს. პარლამენტში მომხდართან დაკავშირებით განცხადება გაავრცელა ბიძინა ივანიშვილმა და პრემიერმა მამუკა ბახტაძემ, ასევე განცხადება გააკეთეს ირაკლი ღარიბაშვილმა და კახა კალაძემ. 

პარლამენტში მართლმადიდებლობის საპარლამენტთაშორისო ასამბლეის მიმდინარეობა შეწყდა. ზაქარია ქუცნაშვილმა კი მოიბოდიშა და თქვა, რომ ასამბლეის ჩასატარებლად არასწორი ადგილი შეარჩიეს.

მომხდარ ფაქტს გამოეხმაურა საქართველოს პრეზიდენტი სალომე ზურაბიშვილი, თამარ ჩუგოშვილი, არჩილ თალაკვაძე. რუსი დეპუტატის ქცევა "ევროპული საქართველოს" წევრებმაც გააპროტესტეს და მათ სპიკერატის ადგილი დაიკავეს.

სწორედ რუსი დეპუტატების ვიზიტს მოჰყვა მოქალაქეების პროტესტი.