ლევან გოგიჩაიშვილი: „ქართული ოცნების“ წევრები ძალიან მძიმე და უხერხულ მდგომარეობაში არიან

დამოუკიდებელი დეპუტატის, ლევან გოგიჩაიშვილის განცხადებით, „ქართული ოცნების“ წევრები ძალიან მძიმე და უხერხულ მდგომარეობაში არიან. ამის შესახებ გოგიჩაიშვილმა „ნაციონალური მოძრაობის“ წევრისთვის, ნიკა მელიასთვის აღკვეთის ღონისძიებად გირაოს გამოყენებასთან დაკავშირებით განაცხადა.

მისი თქმით, მმართველი გუნდი გუშინ არასწორად მოიქცა, ახლა კი სასაცილო სიტუაციაშია.

„ვითომ, არ იმჩნევენ „ქართული ოცნების“ წევრები, მაგრამ ძალიან მძიმე და უხერხულ მდგომარეობაში არიან. პირველ რიგში, უხერხულობა მათმა ხელმძღვანელმა, პარტიის თავმჯდომარემ შეუქმნა. რაც არ უნდა იძახონ, რომ სასამართლო თავისუფალია და ეს გადაწყვეტილება სასამართლომ მიიღო, რა თქმა უნდა, ეს არის ძალით ნათქვამი“, - განაცხადა ლევან გოგიჩაიშვილმა.

საპარლამენტო უმრავლესობის შეფასებით ნიკა მელიასთვის მოსამართლის მიერ აღკვეთს ღონისძიებად დამატებითი შეზღუდვების დაწესება პრაქტიკულად შინა პატიმრობაა. ამის შესახებ მამუკა მდინარაძემ თქვა.

ნიკა მელიას აღკვეთის ღონისძიების სახით 30 ათასლარიანი გირაო შეეფარდა, დაცვის მხარე კი 10 ათასლარიანი გირაოს შეფარდებას ითხოვდა. ამასთან, სასამართლომ ნიკა მელიას გარკვეული შეზღუდვებიც დაუწესა. ნიკა მელია მისთვის გირაოს შეფარდებას საერთაშორისო პარტნიორების აქტიურობას უკავშირებს.

26 ივნისს საქართველოს პარლამენტმა მელიას სადეპუტატო იმუნიტეტი შეუჩერა, გენერალურმა პროკურატურამ კი 25 ივნისს მას ბრალი წაუყენა. როგორც პროკურორმა განაცხადა მელიას მიმართ გამოიკვეთა სისხლის სამართლის კოდექსით გათვალისწინებული დანაშაულის ნიშნები. 

საქართველოს პარლამენტს მელიასთვის დეპუტატის იმუნიტეტის მოხსნასთან დაკავშირებით პროკურატურამ მიმართა. 

21 ივნისს შინაგან საქმეთა სამინისტროში ბრიფინგი გაიმართა, რომელზეც ითქვა, რომ ჯგუფური ძალადობის ორგანიზების საქმეზე გამოკითხვაზე დაიბარეს ნიკა მელია, გიგი უგულავა და ირაკლი ოქრუაშვილი. საქმე ეხება 19-20 ივნისის საპროტესტო აქციას.

20 ივნისს ღამით, პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა, ასევე გამოიყენა რეზინის ტყვიები.

რუსთაველის გამზირზე აქცია მას შემდეგ დაიგეგმა, რაც პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა.