მეთიუ ბრაიზა: ინაშვილის მოწოდება გამოძიების შესახებ საქართველოს არ შეეფერება

მსგავსი მარტივი განცხადება მხოლოდ ავტორიტარულ და არადემოკრატიულ ქვეყანაში შეიძლება გახდეს გამოძიების საგანი. ასეთი კი არ არის საქართველო, - ასე ეხმაურება აშშ-ის სახელმწიფო მდივნის მოადგილის ყოფილი თანაშემწე მეთიუ ბრაიზა „პატრიოტთა ალიანსის“ ლიდერის ირმა ინაშვილის მიერ მის წინააღმდეგ გამოძიების დაწყების მოთხოვნას. ამერიკელი დიპლომატი Imedinews-ს ესაუბრა.

„რაც გუშინდელ ინტერვიუში ვთქვი, იყო ის, რომ ქალბატონმა ირმა ინაშვილმა ხელი ჩაავლო კონფერენციის ორგანიზატორს, ქალბატონ ნინო ევგენიძეს - ირმა ინაშვილმა ხელი შეუშალა კონფერენციის მიმდინარეობას, რაც ჩემს ქვეყანაში შესაძლოა, შეფასებულიყო ფიზიკურ შეურაცხყოფად, რომელიც შეერთებულ შტატებში თავისთავად დანაშაული იქნებოდა.

სამშაბათს საღამოს, ქალბატონ ნინო ევგენიძის პიჯაკზე მართლაც იყო ქალბატონი ინაშვილის ფიზიკური შეტევის კვალი, რომელსაც დაახლოებით რვა საათით ადრე ჰქონდა ადგილი და რაც მე საკუთარი თვალებით ვნახე.

ასეთი მარტივი განცხადება მხოლოდ ავტორიტარულ და არადემოკრატიულ ქვეყანაში შეიძლება გახდეს გამოძიების საგანი. ასეთი კი არ არის საქართველო. საქართველო რჩება განვითარებადი დემოკრატია, რომლის პოლიტიკური ინსტიტუტები იმსახურებენ მტკიცე მხარდაჭერას საქართველოს მოქალაქეების უმრავლესობის მისწრაფების უზრუნველსაყოფად, რაც ევროატლანტიკურ საზოგადოებაში ინტეგრაციას გულისხმობს.

ამრიგად, ქალბატონი ინაშვილის მოწოდება გამოძიების დაწყების შესახებ საქართველოს მსგავსი ქვეყნისთვის სრულიად შეუფერებელია. ამ ქვეყანაში მომავალი არჩევნები განსაზღვრავს დემოკრატიული ევოლუციის შემდეგ ფაზას, როგორც ეს მოხდა 2012 წელს, საქართველოს ისტორიაში პირველად, არჩევნების გზით პოლიტიკური ტრანზიციის ეტაპით. ეს ნამდვილად იყო უდიდესი მიღწევა ქართული დემოკრატიისთვის.

ქალბატონ ინაშვილის პარტიას, არჩევნებზე კონკურენციის დროს, უნდა ჰქონდეს იგივე უფლებები, რაც სხვა პოლიტიკურ პარტიებს, მიუხედავად საქართველოს მოსახლეობის ძალიან დიდი რაოდენობისა, რომლებიც არ ეთანხმებიან მისი პოლიტიკური პარტიის მიზნებსა და პრინციპებს. და ბოლოს, ქალბატონი ინაშვილის უკვე მეორედ გამოჩენა კონფერენციაზე, მიზანშეწონილობასთან უფრო ახლოს იყო. მან უფრო ღირსეულად ისაუბრა. დასვა კითხვები და მიიღო პასუხები, რაც დემოკრატიის პრინციპებისთვის დიდი გამარჯვება იყო“, - განუცხადა მეთიუ ბრაიზამ Imedinews-ს.

„პატრიოტთა ალიანსის“ ლიდერი, პარლამენტის ვიცესპიკერი, ირმა ინაშვილი ამერიკელი დიპლომატის, სახელმწიფო მდივნის მოადგილის ყოფილი თანაშემწის, მეთიუ ბრაიზას წინააღმდეგ გამოძიების დაწყების მოთხოვნით პროკურატურას მიმართავს.

ბრაიზას განცხადებას, რომ ინაშვილმა საერთაშორისო კონფერენციის მსვლელობისას ღონისძიების ერთ-ერთი ორგანიზატორი დაკაწრა, პოლიტიკოსი ცილისწამებად აფასებს.

„პატრიოტთა ალიანსი“ ამერიკელი ექსპერტის დევიდ კრამერის „პერსონა ნონ გრატად“ გამოცხადებასაც მოითხოვს. პოლიტიკური პარტია 15 სექტემბერს, 16:00 საათზე, ამერიკის საელჩოსთან ხალხმრავალი აქციის გამართვას აპირებს. ამ მოთხოვნის საფუძვლად პოლიტიკოსი სასტუმრო „რუმსში“ მომხდარ ინციდენტს ასახელებს, როდესაც ამერიკელმა დაპირისპირებისას მას დაუყვირა და ინაშვილის თქმით, ხელითაც შეეხო. პოლიტიკოსმა ამერიკელი ექსპერტისგან ბოდიშის მოხდაც მოითხოვა. 

10 სექტემბერს, ირმა ინაშვილი სასტუმრო „რუმსში“, საერთაშორისო კონფერენციაზე სიტყვით გამოსვლის მოთხოვნით გამოჩნდა, თუმცა ის ამ ღონისძიებაზე მიწვეული არ ყოფილა, რასაც ხმაური მოჰყვა. მოგვიანებით, პოლიტიკოსმა კონფერენციის მონაწილეებისადმი მიმართვა მაინც მოახერხა და ღონისძიების ამერიკელ სტუმრებს ჰკითხა, არის თუ არა ადამიანების წამება დასავლური ღირებულება. ინაშვილი დისკუსიის მონაწილეებისთვის იმის თქმას შეეცადა, რომ რასაც ბოკერია და სააკაშვილი „პატრიოტთა ალიანსზე“ ამბობენ, სიცრუეა და ისინი უცხოელ პარტნიორებზე მონოპოლიის შენარჩუნებას ცდილობენ. დევიდ კრამერმა კი განმარტა, რომ არ იცოდა, ვინ იყო ქალი, რომელიც ძალიან უხეშობდა და შლიდა კონფერენციას. იმის უარსაყოფად, რომ თითქოს კრამერი ინაშვილს არ იცნობდა, „პატრიოტთა ალიანსის“ ლიდერმა პრესკონფერენციაზე წარმოადგინა კრამერთან ერთად გადაღებული ფოტო, რომელიც მისი თქმით, ვაშინგტონში, 2010 წელს გამართულ შეხვედრაზეა გადაღებული.