კობახიძე: „ნაცმოძრაობის” განშტოებებთან, „ნაცებთან”, „შმაცებთან” და „შმაცუნებთან” კოალიცია გამორიცხულია

ირაკლი კობახიძემ „ნაციონალურ მოძრაობასთან“ და მის განშტოებებთან კოალიციის შექმნა გამორიცხა. ამის შესახებ პარლამენტის ყოფილმა თავმჯდომარემ ჟურნალისტებთან „ქართული ოცნების“ გეგმებზე საუბრისას განაცხადა. 

„იცით, რომ განშტოებები აქვს “ნაციონალურ მოძრაობას”, არიან „ნაცები“, „შმაცები“ და „შმაცუნები“. კოალიციის შექმნა არის გამორიცხული. ასევე არიან პარტიები, რომლებიც ღიად აფიქსირებენ განსხვავებულ საგარეო პოლიტიკურ ორიენტაციას, მაგალითად „პატრიოტთა ალიანსი”, „დემოკრატიული მოძრაობა“, მათთანაც შეუძლებელია კოალიციის ფორმირება. სწორედ ამიტომ ვსაუბრობთ, რომ გვინდა 60%-ის აღება. თუ 60%-ს არ ავიღებთ, გაგვიჭირდება მყარი უმრავლესობის ჩამოყალიბება“, - განაცხადა კობახიძემ. 

მან 2020 წლის არჩევნებზე ოპოზიციის შედეგების პროგნოზი გააკეთა და აღნიშნა, რომ ეეჭვება ოპოზიციამ 40%-ზე მეტი მიიღოს. კობახიძემ „ნაციონალური მოძრაობის“ უპრინციპობაზეც ისაუბრა.

„ჩვენ გვაქვს ჩვენი პრინციპები და წითელი ხაზები, ამიტომ ვსაუბრობთ, რომ არ შეიძლება კოალიცია “ ნაციონალური მოძრაობის” განშტოებებთან და სხვა ორიენტაციის მქონე პარტიებთან. რაც შეეხება „ნაციონალურ მოძრაობას” და მათ განშტოებებს, მათ ეს პრინციპები არ აქვთ. მოვისმინეთ არაერთი განცხადება, რომ თუ „ქართული ოცნება” აიღებს 45%-ს, მაშინ ისინი შექმნიან კოალიციას. მაგალითად, რომან გოცირიძემ გააკეთა ასეთი განცხადება. ეს მათი არჩევანი და ღირებულებებია”, - თქვა კობახიძემ.

კობახიძე საპარლამენტო არჩევნების შესაძლო შედეგების პროგნოზი რამდენიმე კვირის წინაც გააკეთა. მაშინ მან აღნიშნა, რომ სხვადასხვა არჩევნების დროს პროგნოზებს ხშირად აკეთებდა და არსებითად არასოდეს შემცდარა.