ბაქრაძეს აქციის მონაწილეების რაოდენობაზე ოფიციალურმა ცნობამ, თავისი ხელისუფლება გაახსენა

„როგორც ჩანს, დღესაც ისევ იგივე ადამიანები ითვლიან სუს-ში საპროტესტო აქციაზე გამოსულ ადამიანებზე, ვინც ჩვენს დროს ითვლიდა“, - ამის შესახებ "ევროპული საქართველოს" ლიდერმა დავით ბაქრაძემ შსს-ს მიერ დღევანდელი აქციის მონაწილეთა რაოდენობაზე გავრცელებული განცხადების კომენტირებისას თქვა. ინფორმაციას „ნეტგაზეთი“ ავრცელებს.

„როგორც ჩანს, დღესაც ისევ იგივე ადამიანები ითვლიან სუს-ში საპროტესტო აქციაზე გამოსულ ადამიანებს, ვინც ჩვენს დროს ითვლიდა და მაშინაც ასე ამბობდა, რომ როდესაც რუსთაველის გამზირი გადაჭედილი იყო ხუთი ათასი და მაქისმუმ ექვსი ადამიანი ესწრებოდა“, - განაცხადა დავით ბაქრაძემ.

შსს-ს განცხადებით, 17 ნოემბერს თბილისში აქციებზე 7 000 ადამიანი იმყოფებოდა.

"რუსთაველის მიმდებარე ტერიტორიაზე ჩვენს ხელთ არსებული მონაცემებით, იმყოფებოდა დაახლოებით 5 500 მოქალაქე, ასევე აქცია მიმდინარეობდა რესპუბლიკის მოედანზე, სადაც იმყოფებოდა 1500-მდე მოქალაქე და აჭარაში, კერძოდ, ბათუმში იმყოფებოდა 50-მდე მოქალაქე. შსს განაგრძობს საზოგადოებრივი წესრიგისა და მართლწესრიგის დაცვას, ასევე უზრუნველყოფს თითოეული მოქალაქის გამოხატვის თავისუფლების დაცვას", – განაცხადა საპატრულო პოლიციის დეპარტამენტის უფროსმა, ვაჟა სირაძემ.

მანამდე სააგენტო Reuters-მა გაავრცელა ინფორმაცია იმის შესახებ, რომ თბილისში აქციებში მონაწილეობა 20 000-მა ადამიანმა მიიღო. 

ოპოზიციის აქცია პარლამენტის წინ 15:00 საათზე დაიწყო, მოგვიანებით კი პარლამენტის ჭიშკარს ბოქლომი დაადეს, რასაც მმართველი გუნდიდან რომან კაკულიამ უპასუხა, რომ პარლამენტის ბლოკირება დიალოგის გზას სპობს. დღესვე აქცია გამართა „პატრიოტთა ალიანსმაც“.

გაერთიანებული ოპოზიციის მოთხოვნებია: „ვადამდელი პროპორციული არჩევნები, მთავრობის გადადგომა და სამოქალაქო საზოგადოებით დაკომპლექტებული ცესკო“. 

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა.

მოგვიანებით მმართველი გუნდი რუსთავის მაჟორიტარმა გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.