ანრი ოხანაშვილი: „ქართული ოცნება“ ძალიან მაღალი დიპლომატიითა და პოლიტიკური პასუხისმგებლობით მოეკიდა დავით გარეჯის საკითხს

„ქართული ოცნების“ გუნდი, ძალიან მაღალი დიპლომატიით და მაღალი პოლიტიკური პასუხისმგებლობით მოეკიდა ამ საკითხს. ჩვენ ეს საკითხი არ წარგვიმართავს პოლიტიკურ კონტექსტში. ეს არის წარმოუდგენელი რამ, თუკი ვინმეს სურს ეს საკითხი გადაიყვანოს პოლიტიკურ კონტექსტში და ამის პოლიტიზაცია მოახდინოს. ამის პოლიტიზირება არის ჩვენი ქვეყნის საწინააღმდეგო ქმედება, - ტერიტორიის ნაწილის გადაცემისკენ მიმართული ქმედების ბრალდებით დაწყებულ გამოძიებაზე პარლამენტის იურიდიულ საკითხთა კომიტეტის თავმჯდომარე, ანრი ოხანაშვილმა „დღის ქრონიკაში“ ისაუბრა.

„როდესაც ჩვენი ქვეყნის საგარეო საქმეთა მინისტრი კოლეგა მინისტრს შეხვდა და ისაუბრეს ამ თემაზე, ნახეთ, როგორი მაღალი დიპლომატიით, პოლიტიკური პასუხისმგებლობითა და კულტურით გაჟღერდა ეს საკითხები. მაქსიმალური სიფრთხილით, ყოველგვარი პოლიტიზირების გარეშე. ჩვენ ვნახეთ როგორ დაიწყეს ამ თემის პოლიტიზირება პოლიტიკური ჯგუფების გარკვეულმა ნაწილმა. განსაკუთრებით რადიკალურმა ჯგუფებმა, მიიტანეს იერიში საგარეო საქმეთა მინისტრზე, მიაყენეს შეურაცხყოფა, დაიბარეს საქართველოს პარლამენტში. მას მოუწია ამ შეურაცხყოფის ატანა. ამ ყველაფრის მიუხედავად, მას არ გაუსაჯაროებია საქმის დეტალები, ვინაიდან ეს იყო მაღალი პოლიტიკური პასუხისმგებლობა, სახელმწიფოებრივი მიდგომა. დაუშვებელია ამ თემით სპეკულირება, ამ თემის პოლიტიზირება. ეს საკითხები უდნა წარიმართოს ორ ქვეყანას, საქართველოსა და აზერბაიჯანს შორის, ძალიან დიდი პასუხისმგებლობით, კეთილმეზობლური პარტნიორული მიდგომით და სწორედ ამის შედეგად დავსვათ საკითხები გადახედვასთან დაკავშირებით. ეროვნული ინეტერესების შესაბამისად მოქმედება“, - განაცხადა ანრი ოხანაშვილმა.

პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.