ირაკლი კობახიძე: როდესაც ხედავ, რომ არსებობს მომეტებული რისკები, პასუხისმგებლობით უნდა იმოქმედო - სამწუხაროდ, ეს არ გააკეთეს „პრაიდის“ ორგანიზატორებმა

„როდესაც ხედავ, რომ არსებობს მომეტებული რისკები, პასუხისმგებლობით უნდა იმოქმედო და რაღაც ნაბიჯებისგან უნდა შეიკავო თავი. სამწუხაროდ, ეს არ გააკეთეს „პრაიდის“ ორგანიზატორებმა“, - ამის შესახებ პარტია „ქართული ოცნების“ თავმჯდომარემ, ირაკლი კობახიძემ ბრიფინგზე განაცხადა.

მისივე განცხადებით, დღის განმავლობაში, ყველაზე მძიმე, რაც მოხდა, იყო ჟურნალისტებზე ძალადობა.

„შსს-მ გააკეთა ძალიან მკაფიო განცხადება, რომლითაც ითქვა, რომ ყველა პირი, რომელმაც იძალადა, განსაკუთრებით - ჟურნალისტებზე, მიეცემა სისხლის სამართლის პასუხისგებაში. ესაა მკაფიო განცხადება და, რა თქმა უნდა, ხელისუფლება ამ განცხადების შესაბამისად იმოქმედებს. სამართალდამცველი ორგანოების ხელმძღვანელებმა ზუსტად იციან, როგორ უნდა დაიგეგმოს ოპერაცია სწორად. როდესაც საქმე გვაქვს ადამიანების მასასთან და დიდ რაოდენობასთან, არსებობს ობიექტური სირთულეები და, ზოგ შემთხვევაში, აუცილებელია, ადამიანების შედარებით მცირე ჯგუფი განარიდო შედარებით დიდ ჯგუფს, იმისთვის, რომ ინციდენტები არ მოხდეს. გამომდინარე იქიდან, რომ იქ იყო აგრესიის არა მხოლოდ რისკი, არამედ - ფაქტები, საჭირო იყო დაშორიშორება. ყველაზე მძიმე, რაც დღეს ვიხილეთ, იყო აგრესია და ძალადობა ჟურნალისტების წინააღმდეგ. ამას სჭირდებოდა პრევენცია და სწორედ ამ მიზეზით მოხდა დაშორიშორება. ოპერაცია იყო სწორად დაგეგმილი და ამაზე პასუხს სამართალდამცველი ორგანოები გაგცემენ. როდესაც ხედავ, რომ არსებობს მომეტებული რისკები, პასუხისმგებლობით უნდა იმოქმედო და რაღაც ნაბიჯებისგან უნდა შეიკავო თავი. სამწუხაროდ, ეს არ გააკეთეს „პრაიდის“ ორგანიზატორებმა. მათ იმოქმედეს იმ ძალების შესაბამისად, რომელთაც ამ ქვეყნისთვის სიკეთე არ უნდათ“, - აღნიშნა ირაკლი კობახიძემ.

ცოტა ხნის წინ, „თბილისი პრაიდმა“ განცხადება გაავრცელა, რომლის მიხედვითაც, მარში დღეს არ შედგება.

დღეს „თბილისი პრაიდის“ მოწინააღმდეგეები „პრაიდის“ ორგანიზატორების ოფისში შეიჭრნენ, დაიკავეს აივანი, ჩამოხსნეს ლგბტ თემის შვიდფერიანი დროშა და საქართველოს დროშა აღმართეს. იქამდე, „სირცხვილიას“ ოფისს ბოთლები და სამშენებლო ფილები დაუშინეს. ამასთან, ფიზიკურად გაუსწორდნენ არაერთი მედიასაშუალების, მათ შორის, „იმედის“ თანამშრომლებს.

„სირცხვილიასა“ და „თბილისი პრაიდის“ ოფისზე განხორციელებულ კანონსაწინააღმდეგო ფაქტებთან დაკავშირებით, შსს-მ გამოძიება დაიწყო.