გიგა ბოკერია: 21 ხმის გარანტიას გაძლევთ და დააბრუნეთ მეორე მოსმენაზე კონსტიტუცია

„ვინმე თუ ისეთი თავნება გყავთ, მხარს არ გიჭერთ, 21 ხმის გარანტიას გაძლევთ. დააბრუნეთ მეორე მოსმენაზე კონსტიტუცია“, – ამის შესახებ „ევროპული საქართველოს“ ერთ-ერთმა ლიდერმა გიგა ბოკერიამ პარლამენტის რიგგარეშე სხდომაზე განაცხადა, სადაც კონსტიტუციის პროექტის მესამე მოსმენის საკითხი იხილება. ინფორმაციას ipn-ი ავრცელებს.

„სად გეჩქარებათ, გამაგებინეთ?! დააბრუნეთ მეორე მოსმენაზე, დაგიჭერთ მხარს. ვინმე თუ ისეთი თავნება გყავთ მხარს არ გიჭერთ, აგერ გარანტიას გაძლევთ 21 ხმის, დააბრუნეთ უკან. აბა, რისთვის უგზავნიდით ვენეციის კომისიას? ჯერ ხომ გაუგზავნეთ ერთი ვარიანტი ვენეციის კომისიას, გადააგდეთ, მიიღეთ სხვა ვარიანტი. მერე, ორი მოსმენის შემდეგ გაუგზავნეთ და თქვით, ველოდებით დასკვნასო. მოგივიდათ დასკვნა და არაფერს არ ითვალისწინებთ და ისე მიგყავთ პროცესი. თქვენი სიტყვები მახსოვს, ვენეციის კომისიის სამართლებრივ შენიშვნას ყველას გავითვალისწინებთო, მაგრამ არც ერთს არ ითვალისწინებთ. კიდევ ერთხელ რიტორიკული კითხვა – რატომ არ შეგაქვთ ეს ცვლილება ახლავე და რატომ ამთავრებთ პროცესს ისე, რომ არ ასრულებთ თქვენივე ნათქვამ სიტყვას? – განაცხადა სხდომაზე გიგა ბოკერიამ.

პარლამენტში მიმდინარე რიგგარეშე სხდომა, სადაც საკონსტიტუციო ცვლილებებს მესამე მოსმენით უნდა ეყაროს კენჭი, „ევროპულმა საქართველომ" და „ნაციონალურმა მოძრაობამ" პროტესტის ნიშნად დატოვეს. სხდომაზე რეგისტრაცია 119-მა დეპუტატმა გაიარა. 

პარლამენტმა კონსტიტუციაში დაგეგმილი ცვლილებების პროექტი 23 ივნისს რიგგარეშე სესიაზე მეორე მოსმენით, პირველი მოსმენის მსგავსად 115 ხმით მიიღო.