კობახიძე: ვენეციის კომისიის დასკვნის არსზე საუკეთესო პასუხს ოპოზიციის რეაქცია გვაძლევს

პარლამენტის თავმჯდომარე რიგგარეშე სხდომაზე დასკვნით სიტყვას წარმოთქვამს. ირაკლი კობახიძის განცხადებით, ვენეციის კომისიის დასკვნის არსის შესახებ ყველაზე კარგ პასუხს ოპოზიციის რეაქცია იძლევა. მისი თქმით, დასკვნის გამოქვეყნებიდან მეორე დღეს ოპოზიციას განცხადებები არ გაუკეთებია.

"გამოქვეყნდა დასკვნა და ამ დასკვნის არსის თაობაზე საუკეთესო პასუხს გვაძლევს ოპოზიციის რეაქცია - დასკვნის გამოქვეყნებიდან მეორე დღეს ოპოზიციის მხრიდან აბსოლუტური სიჩუმე იყო. და ეს სიჩუმე იმის დასტურია, რომ ვენეციის კომისიამ შეაფასა დოკუმენტი როგორც პოზიტიური და არაფერი დაუტოვა სათქმელი ოპოზიციას.

პრეზიდენტმა 20 პარტიასთან ერთად შეადგინა თავისი კონსტიტუცია და შემოგვთავაზა განსახილველად. წარმოდგენილი საკითხები იყო: პრეზიდენტის პირდაპირი წესით არჩევა, მთავრობასთან დაკავშირებით ცვლილებები, რომლებიც როტაციას შეეხებოდა, უშიშროების საბჭოს გაუქმების საკითხი, თავდაცვის საკითხების მოწესრიგება, საარჩევნო ბარიერის დაწევა და ბლოკების გაუქმება. არცერთი ეს საკითხი ვენეციის კომისიამ არ გაიზიარა.

ერთადერთი რაც გაიზიარა იყო ბონუსის სისტემა, და ამაზე ჩვენ უკვე გამოვხატეთ პოზიცია და ვთქვით, რომ ახალი კანონპროექტის ინიცირება მოხდება და მეორე სადაც მსგავსება იყო პოზიციებში, წარმოადგენს ვადის გადაწევის თემას", - განაცხადა ირაკლი კობახიძემ.

პარლამენტის თავმჯდომარემ ოპოზიციის მიერ სხდომის დატოვების შესახებაც ილაპარაკა და თქვა, ოპოზიცია სხდომათა დარბაზიდან გაიქცა და ეს უკვე მესამე შემთხვევაა. "როდეს ოპოზიცია სვამს შეკითხვებს, მათ პასუხის მიღების ეშინიათ. მათ დიალოგში შემოსვლის არავითარი რესურსი არ აქვთ. იგივე შეეხება საქართველოს პრეზიდენტსაც", - განაცხადა კობახიძემ.

პარლამენტში მიმდინარე რიგგარეშე სხდომა, რომელზეც საკონსტიტუციო ცვლილებებს მესამე მოსმენით უნდა ეყაროს კენჭი, "ევროპულმა საქართველომ" და "ნაციონალურმა მოძრაობამ" პროტესტის ნიშნად დატოვეს.

პარლამენტში მიმდინარე რიგგარეშე სხდომის პარალელურად, დღეს საკანონმდებლო ორგანოსთან მოსახლეობამ აქცია-პერფომანსი გამართა. „ძირს ნაცქოცური დემოკრატია“ - ასეთი წარწერა ამშვენებდა კუბოს, რომელიც მოქალაქეებმა პარლამენტთან მიიტანეს.

ისინი ამ აქციით პარლამენტის მიერ კონსტიტუციის არსებული პროექტის მიღებას აპროტესტებენ. 

პარლამენტმა კონსტიტუციაში დაგეგმილი ცვლილებების პროექტი 23 ივნისს რიგგარეშე სესიაზე მეორე მოსმენით, პირველი მოსმენის მსგავსად 115 ხმით მიიღო.