მაჩალიკაშვილის მამა: ჩემს შვილს საქართველოს წინააღმდეგ აზრი რომ გაევლო, ჩემი ხელით დავახრჩობდი

სახელმწიფო უსაფრთხოების სამსახურმა დღეს გაასაჯაროვა ვიდეოკადრები, რომელშიც ჩანს თუ როგორ გადაადგილდებიან პანკისის ხეობასა და თბილისში სპეცოპერაციის დროს დაკავებული პირები, მათ შორის თემირლან მაჩალიკაშვილი ბერი გაბრიელ სალოსის ქუჩაზე. 

სუსმა ასევე განაცხადა, რომ არსებობს მტკიცებულებები, რომელთა მიხედვითაც დგინდება, რომ თემირლან მაჩალიკაშვილი აჰმედ ჩატაევთან და ტერორიზმში ბრალდებულ სხვა პირებთან კავშირშია. ასევე ცნობილი გახდა, რომ მაჩალიკაშვილის საბანკო ანგარიშების შესწავლა მიმდინარეობს.

სუსის მიერ გავრცელებულ ვიდემასალას თემირლან მაჩალიკაშვილის ოჯახი ეხმიანება. მალხაზ მაჩალიკაშვილი ამბობს, რომ მან არ იცის რა საბანკო ანგარიშებზეა. 

"ასეთ დღეში ჩააგდეს ბავშვი და რაღაც ხომ უნდა თქვან. ბორზიევს და სხვა პირებს არ ვიცნობ, კავშირი არ გვქონდა შესაძლოა შემთხვევით ჰყავს ნანახი. შვილი თბილისში სასწავლებლად ჩამოვიყვანე, რათა მიეღო განათლება, ინგლისურის სწავლას აპირებდა და შეგუებოდა საზოგადოებას. შეგიძლიათ ლექტორებთან და მასწავლებლებთან გადაამოწმოთ. მას ქონდა საზოგადოების კომპლექსი. (რაც შეეხება რეკვიზიტებს) გვყავდა ახლობელი თურქეთში და ორჯერ გადმოურიცხა ას-ასი დოლარი, ასევე სიძე და და ჰყავს გერმანიაში, ისინიც ეხმარებოდნენ ერთადერთ ძმას. ეს ორი წლის წინ ხდებოდა. ჩემს შვილს საქართველოს წინააღმდეგ რამე აზრი რომ მოსვლოდა, ჩემი ხელით დავახრჩობდი", - ამბობს მალხაზ მაჩალიკაშვილი.

სუს-ის მიერ გავრცელებულ ვიდეო მასალას დაჭრილის, თემირლან მაჩალიკაშვილის ბებია პანკისიდან ცოტა ხნის წინ გამოეხმაურა.

"ქისტები და ჩეჩნები ერთმანეთს ეხმარებიან, როცა კი ამის აუცილებლობაა. არ გამოვრიცხავ, რომ ლიკვიდირებულიდან რომელიმეს იცნობდა, თუმცა არგუმენტი რომ თემირლანი ტერორისტებთან კავშირშია კატეგორიულად გამოვრიცხავ",- ამბობს ელენე მაჩალიკაშვილი.

შეგახსენებთ, რომ თემირლან მაჩალიკაშვილი პანკისში სპეცოპერაციის დროს დაიჭრა. მისი ჯანმრთელობის მდგომარეობა მძიემა. საუბარი მის საზღვარგარეთ წაყვანასა და მკურნალობაზე. 

პანკისსა და თბილისში ჩატარებული სპეცოპერაციის დროს სუსმა 5 პირი დააკავა. თბილისის საქალაქო სასამართლომ მათ პატიმრობა შეუფარდა. 

ბრალდების მიხედვით, დაკავებულები, სავარაუდოდ, აჰმედ ჩატაევის მოკავშირეები იყვნენ, ისინი დაეხმარნენ ჩატაევს საქართველოს საზღვარზე გადმოსვლასა და თბილისში ბინის ქირაობაში, სადაც 21-22 ნოემბერს სპეცოპერაცია ჩატარდა. 

სუსის ცნობით, დაკავებული პირები 21-22 ნოემბრის სპეცოპერაციის დროს მოკლულ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმები საქართველოში მომუშავე დიპლომატიურ კორპუსზე.