ამირან გამყრელიძე 40 წლამდე ექიმებს მოუწოდებს წითელაზე აიცრან

"მოვუწოდებ განსაკუთრებით 40 წლამდე ექიმებს, აიცრან წითელაზე,”- ეს განცხადება ამირან გამყრელიძემ, დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორმა დღეს  ბათუმში, ექიმებთან შეხვედრის დროს გააკეთა. ინფორმაციას გაზეთი "ბათუმელები" ავრცელებს.

ამირან გამყრელიძის თქმით, წითელას გავრცელება ამჯერად სამედიცინო მუშაკებიდან დაიწყო, რადგან „40 წლამდე ადამიანების დიდი ნაწილი და მათ შორის ექიმები, წითელაზე აცრილი არ არის. "რაც შეეხება 40 წელს ზემოთ ექიმებს, ამირან გამყრელიძემ განაცხადა, რომ მათ შედარებით მყარი იმუნიტეტი აქვთ.

დაავადებათა კონტროლის ცენტრის დირექტორმა ექიმებს მხარდაჭერისკენ მოუწოდა და უთხრა, რომ მედიკამენტი, რითაც კეთდება ვაქცინა წითელაზე, სანდოა და რეკომენდებული ჯანდაცვის მსოფლიო ორგანიზაციის მიერ.

"გთხოვთ, მოგვეხმაროთ ამ საკითხში. ექიმთა საზოგადოება ამ პროცესში უნდა იყოს სამაგალითო პირველ რიგში,”- აღნიშნა ამირან გამყრელიძემ.

დღევანდელ შეხვედრას ექიმთა საზოგადოებასთან საქართველოს ჯანდაცვის მინისტრი, დავით სერგეენკოც ესწრებოდა.

მანამდე მასობრივი ვაქცინაცია საჯარო დაწესებულებებში დაავადებათა კონტროლისა და საზოგადოებრივი ჯანმრთელობის ეროვნული ცენტრის ინიციატივით დაიწყო და მას კამპანიური სახე ექნება. ხოლო, მათ ვისაც წითელა-წითურა-ყბაყურას გეგმური ვაქცინა გაკეთებული არ აქვთ, აცრის გაკეთება პირველადი ჯანდაცვის დაწესებულებებში შეეძლებათ.

საქართველოში 7 თებერვლის მდგომარეობით  წითელას ვირუსის 130-ზე მეტი შემთხვევა დაფიქსირდა. შემთხვევების 40% 5  წლამდე ასაკის ბავშვებში, 50 % კი 30 წელს ზემოთ პირებში ფიქსირდება. საზოგადოებრივი ჯანდაცვის ცენტრი მოსახლეობას ვაქცინაციისკენმოუწოდებს. 

წითელას ვაქცინაცია 40 წლამდე ასაკის მოქალაქეებისთვის უფასოა. 40 წელს ზემოთ პირებისთვის კი ის უფასო მხოლოდ იმ შემთხვევაშია, თუ მას კონტაქტი ჰქონდა წითელათი დაავადებულთან.