კახიშვილი: ძალადობრივ დანაშაულზე შეფასების საუკეთესო კრიტერიუმი ზეპირი მოსმენაა

სასჯელაღსრულების მინისტრმა კახა კახიშვილმა პრეზიდენტის მიერ ვეფხია ბაქრაძის შეწყალებასთან დაკავშირებით, გიორგი მარგველაშვილის განმარტებებზე კომენტარი გააკეთა. ამის შესახებ მან 1tv-ს ეთერში ილაპარაკა.

კერძოდ კახიშვილის კომენტარი შეეხება პრეზიდენტის ნათქვამს იმის შესახებ, რომ ბაქრაძის შეწყალებაზე სასჯელაღსრულების სამინისტროდან დადებითი რეკომენდაცია იყო შეწყალების კომისიაში შესული.

„იმას, რასაც მსჯავრდებულის დახასიათებას ეძახიან, ვერც დადებითი იქნება და ვერც უარყოფითი, რადგან იქ მოკლე ფაქტებით კონსტატირებული, ინტერვიუს სახით ჩამორთმეული საკითხებია. როდესაც მსჯავრდებულს ეკითხებიან, ინანიებს თუ არა დანაშაულს და ის პასუხობს ვინანიებო, ვერ ჩაწერ, რომ არ ინანიებს, რადგან ეს დასკვნა არ არის. ეს მისი ინტერვიუა“, – განაცხადა კახიშვილმა.

ამასთან, კახიშვილი დასძენს, რომ გამორიცხული არ არის ვადამდე ადრე გათავისუფლებულმა ადამიანმა დანაშაული ისევ ჩაიდინოს. მისი თქმით, ამისგან "დაზღვეული არავინ არის". 

"ასი პროცენტით ვერ იტყვი, რომ ადამიანი, რომელიც თავისუფლდება, დანაშაულს აღარ ჩაიდენს და უკან არ დაბრუნდება. თუმცა, ადამიანი კარგად უნდა შეისწავლო, როდესაც მის გათავისუფლებაზე გადაწყვეტილებას იღებ“, – განაცხადა კახიშვილმა. 

მინისტრის განმარტებით, გათავისუფლების პროცესში ყველა ობიექტური გარემოება უნდა იყოს შესწავლილი.

"როცა საქმე ძალადობრივ დანაშაულთან გვაქვს, ყველაზე კარგი შეფასების კრიტერიუმი ზეპირი მოსმენაა“, – დასძინა კახიშვილმა.

შეგახსენებთ, რომ დღეს პრეზიდენტმა მარგველაშვილმა განმარტება გააკეთა ბარნოვის ქუჩაზე მოკლული გოგოს მკვლელობისთვის დაკავებული ვეფხია ბაქრაძის შესახებ, რომელიც წარსულში სწორედ პრეზიდენტმა შეიწყალა.  პრეზიდენტის ბრიფინგის შემდეგ, ამ თემაზე განმარტება სასჯელაღსრულებისა და პრობაციის სამინისტროს იურიდიული დეპარტამენტის უფროსმა გააკეთა.

ამ ფაქტის გახმაურებას ოპოზიციასა და უმრავლესობაში კრიტიკული შეფასებები მოჰყვა.დღესვე ევროპულმა საქართველომ ფემიციდთან და ოჯახში ძალადობასთან დაკავშირებით ორი ინიციატივა წარადგინა.