თბილისის სატრანსპორტო კომპანიის გენდირექტორების მიერ მიღებული ხელფასები გასაჯაროვდა

თბილისის მეტროპოლიტენის მემანქანეები 4 ივნისს დილიდან გაიფიცნენ და უკვე მეორე დღეა მეტრო არ მუშაობს. მემანქანეები ამჟამად არსებული საათობრივი ანაზღაურების გაზრდას, კერძოდ, საათში ხელზე ასაღები ამჟამად არსებული 7 ლარიდან თანხის 10 ლარამდე გაზრდას ითხოვენ. 

გამოცემა droa.ge დაინტერესდა, რა ანაზღაურება აქვთ მიღებული თბილისის სატრანსპორტო კომპანიის მხოლოდ გენერალურ დირექტორებს 2014 წლის ადგილობრივი თვითმმართველობის არჩევნებიდან დღემდე.

2014 წლიდან სატრანსპორტო კომპანიაში სამი ხელმძღვანელი შეიცვალა. 2014 წლის აგვისტოს ბოლოს კომპანიის დირექტორად ალექსანდრე ჯაფარიძე დანიშნა.  მან 2014-2015 წლებში ხელფასის სახით 121 280 ლარი აიღო.

2016 წლის აპრილის ბოლოს ალექსანდრე ჯაფარიძე ნუგზარ ჭეიშვილმა შეცვალა. ჭეიშვილს, ამ თანამდებობაზე ყოფნისას, დეკლარაცია ორჯერ – 2016 და 2017 წლებში აქვს შევსებული. პირველ დეკლარაციაში სხვა უწყებებში მიღებული შემოსავლებია ნაჩვენები, სატრანსპორტო კომპანიიდან ამ დროისთვის ანაზღაურება მიღებული არ ჰქონია, შესაბამისად, თანხაც დეკლარაციაში ასახული არ არის.

რაც შეეხება მეორე დეკლარაციას, მისი შევსებისას ჭეიშვილმა კანონი დაარღვია და სახელფასო ანაზღაურების სახით მიღებული თანხა არ გაასაჯაროვა, თუმცა, მისი ანაზღაურების შესახებ ინფორმაცია მაინც გავრცელდა. On.ge-ს მიერ კომპანიიდან გამოთხოვილი ინფორმაცის თანახმად ირკვევა, რომ 2016 წლის 1 მაისიდან 31 დეკემბრამდე, 8 თვეში, ჭეიშვილმა ამ თანამდებობაზე 56 080 ლარი გამოიმუშავა. ჭეიშვილი ამ თანამდებობაზე 2017 წლის ნოემბრის ბოლომდე მუშაობდა, თუმცა დეკლარაცია აღარ შეუვსია. ამიტომ უცნობია რა ანაზღაურება მიიღო 11 თვის განმავლობაში.

2017 წლის ნოემბრის ბოლოს სატრანსპორტო კომპანიის გენერალურ დირექტორად მამუკა კობახიძე დანიშნა. კობახიძემ 2017 წლის შემოსავლებთან დაკავშირებით დეკლარაცია 2018 წლის მარტში შეავსო და ამ თანამდებობაზე 2017 წელს, 42 დღის განმავლობაში მიღებული შემოსავალიც ასახა.  კობახიძემ არასრულ 2 თვეში, სახელფასო ანაზღაურების სახით, 13 333 ლარი მიიღო.

საჯარო ინფორმაციის მიხედვით, მხოლოდ 25 თვეში, ჯამში, თბილისის სატრანპორტო კომპანიის გენერალურ დირექტორებზე, სახელფასო ანაზღაურების სახით, 190 693 ლარია გაცემული.

"თუ დავუშვებთ, რომ თბილისის მერია მართალია და მეტროს მემანქანეების ყოველთვიური ანაზღაურება მართლაც 1800 ლარია, გამოდის, რომ სატრანსპორტო კომპანიის გენდირექტორების მხოლოდ 25 თვის ხელფასებზე გაცემული თანხა მეტროპოლიტენის მემანქანეების 105,9 თვის, ანუ თითქმის 9 წლის ხელფასს შეადგენს. ხოლო თუ მემანქანეებს ვენდობით, რომლებიც ამბობენ, რომ მათი ხელფასი 1200 ლარია, გამოდის, რომ გენდირექტორებზე 25 თვეში გაცემული თანხა მემანქანეების 158,9 თვის, ანუ 13 წლის ხელფასს ეყოფა", - წერს გამოცემა droa.ge

მეტროს მემანქანეები 4 ივნისის დილიდან გაიფიცნენ, რის გამოც ამ დროისთვის ყველა მეტროსადგური გაჩერებულია. მეტროსადგურების მუშაობის აღდგენამდე ავტობუსებით მგზავრობა უფასო იქნება.

თბილისის მეტროპოლიტენის მემანქანეები საათობრივი ანაზღაურების გაზრდას 2 აპრილიდან ითხოვენ. თბილისის მერმა არაერთხელ განაცხადა, რომ მეტროპოლიტენის მემანქანეებს ხელფასს ვერ გაუზრდის.