ადვოკატი: ფარცხალაძე ლევან ყიფიანის მიერ გავრცელებულ ინფორმაციას ეთანხმება

ყოფილი მთავარი პროკურორი ოთარ ფარცხალაძე მზადაა „ომეგა ჯგუფის" საქმეზე, დაინტერესების შემთხვევაში, გამოძიების ნებისმიერ კითხვას უპასუხოს, - ამის შესახებ ფარცხალაძის ადვოკატმა გაგი მოსიაშვილმა დღეს გამართულ პრესკონფერენციაზე განაცხადა. მისი თქმით, ფარცხალაძე ადასტურებს და ეთანხმება იმ ინფორმაციას, რომელიც მისმა მეგობარმა ლევან ყიფიანმა გააჟღერა.ინფორმაციას „ინტერპრესნიუსი“ ავრცელებს.

„ლევან ყიფიანთან ოთარს აქვს მეგობრული ურთიერთობა. ეს დამალული არაა. მე გიდასტურებთ, რომ მათ აქვთ საქმიანი მეგობრული ურთიერთობა", - განმარტა მოსიაშვილმა.

ადვოკატისთვის უცნობია, არის თუ არა ლევან ყიფიანი ფარცხალაძის სახლში ნამყოფი.

დაახლოებით ერთი თვის წინ ორი ტელეკომპანიის ეთერში სკანდალური აუდიო ჩანაწერების გამოქვეყნება დაიწყო, რომელთა მთავარი ფიგურანტები ომეგა ჯგუფის დამფუძნებელი ზაზა ოქუაშვილი და სპორტის ყოფილი მინისტრი ლევან ყიფიანი იყვნენ.

ამ აუდიოჩანაწერებით ოქუაშვილს სურს დაადასტუროს, რომ ხელისუფლება მასა და მის ტელევიზიაზე („იბერია“) ზეწოლას ახორციელებს. თავის მხრივ, ხელისუფლება აცხადებს, რომ ბიზნესმენს სახელმწიფოს მიმართ 51 მილიონი ლარის ოდენობით დავალიანება მართებს, რომლის გადახდაც არ უნდა.

3 ოქტომბერს სასამართლოში დაკითხვიდან გამოსულმა სპორტის ყოფილმა მინისტრმა განაცხადა, რომ სახელმწიფოსგან ზეწოლაზე ჩანაწერები ომეგა ჯგუფის ხელმძღვანელთან ერთად, შეთანხმებულად ჩაწერა.

9 ოქტომბერს ყიფიანის პროკურატურისთვის მიცემული ჩვენება მთავარმა პროკურატურამაც გაასაჯაროვა, რომელშიც ყიფიანი ადასტურებს, რომ ფინანსთა სამინისტრომ არაერთხელ გადაავადა დავალიანების გადაუხდელობის გამო აღსრულების პროცესი, რათა კომპანიის საქმიანობა არ შეფერხებულიყო და ხალხი უმუშევარი არ დარჩენილიყო.

ამასთან, ლევან სამხარაულის სახელობის ექსპერტიზის ბიურომ დაასკვნა. რომ „ომეგა ჯგუფის“ საქმეზე ტელევიზიებით გავრცელებული აუდიოჩანაწერები ავთენტიკური არ არის და დამონტაჟებულია. ანალოგიური აღმოჩნდა ლონდონის ექსპერტიზის ბიუროს დასკვნაც.

მედიაში გავრცელებული ჩანაწერების გამო პროკურატურაში გამოძიება 12 სექტემბერს დაიწყო.