კახა კალაძე: თუ საჭიროა ფარცხალაძის დაკითხვა, დაიკითხება

გამოძიება დაწყებულია და თუ საჭიროა ფარცხალაძის დაკითხვა, დაიკითხება, – ასე უპასუხა დედაქალაქის მერმა კახა კალაძემ ჟურნალისტების შეკითხვას, „ომეგა-ჯგუფის“ საქმეზე უნდა დაიბარონ თუ არა ყოფილი მთავარი პროკურორი ოთარ ფარცხალაძე. ამის შესახებ 1tv წერს.

„ამ თემასთან დაკავშირებით ბევრჯერ მომიწია განცხადების გაკეთება. კიდევ ერთხელ ვიმეორებ, თუ არსებობს რაიმე საჭიროება, რომ კონკრეტული ადამიანები იყვნენ დაკითხულნი, გამოძიება დაწყებულია და იმოქმედებს. თუ საჭიროა ფარცხალაძის დაკითხვა, დაიკითხება, თუ საჭიროა ვინმე სხვა კონკრეტული პირის დაკითხვა, დაიკითხება.

ჩემს პირად პოზიციას რაც შეეხება, საერთოდ, თემას არ ვიცნობ, საქმის დეტალები არ ვიცი. ამასთან, არც გამომძიებელი ვარ. მე ვარ ქალაქის არჩეული მერი, 51% მივიღე არჩევნებში და ვასრულებ ჩემს უფლება-მოვალეობას. ფარცხალაძეზე ერთადერთი შემიძლია გითხრათ ის მერიაში არ მუშაობდა და არ მუშაობს“, – განუცხადა კალაძემ ჟურნალისტებს.

ყოფილი მთავარი პროკურორი ოთარ ფარცხალაძე მზადაა „ომეგა ჯგუფის" საქმეზე, დაინტერესების შემთხვევაში, გამოძიების ნებისმიერ კითხვას უპასუხოს, - ამის შესახებ ფარცხალაძის ადვოკატმა გაგი მოსიაშვილმა განაცხადა. მისი თქმით, ფარცხალაძე ადასტურებს და ეთანხმება იმ ინფორმაციებს, რომელიც მისმა მეგობარმა ლევან ყიფიანმა გააჟღერა.

3 ოქტომბერს სასამართლოში დაკითხვიდან გამოსულმა სპორტის ყოფილმა მინისტრმა განაცხადა, რომ სახელმწიფოსგან ზეწოლაზე ჩანაწერები "ომეგა ჯგუფის" ხელმძღვანელთან ერთად, შეთანხმებულად ჩაწერა.

9 ოქტომბერს ყიფიანის პროკურატურისთვის მიცემული ჩვენება მთავარმა პროკურატურამაც გაასაჯაროვა, რომელშიც ყიფიანი ადასტურებს, რომ ფინანსთა სამინისტრომ არაერთხელ გადაავადა დავალიანების გადაუხდელობის გამო აღსრულების პროცესი, რათა კომპანიის საქმიანობა არ შეფერხებულიყო და ხალხი უმუშევარი არ დარჩენილიყო.

ამასთან, ლევან სამხარაულის სახელობის ექსპერტიზის ბიურომ დაასკვნა. რომ „ომეგა ჯგუფის“ საქმეზე ტელევიზიებით გავრცელებული აუდიოჩანაწერები ავთენტიკური არ არის და დამონტაჟებულია. ანალოგიური აღმოჩნდა ლონდონის ექსპერტიზის ბიუროს დასკვნაც.

მედიაში გავრცელებული ჩანაწერების გამო პროკურატურაში გამოძიება 12 სექტემბერს დაიწყო.