ალექსი პეტრიაშვილი ივანიშვილის მიმართვაზე: მზად ვარ, ქვეყნის სამსახურში ვიყო, ჩემი მისამართი ყველამ იცის

მზად ვარ, საერთაშორისო ურთიერთობების კუთხით ქვეყანას გამოვადგე, - ამის შესახებ „თავისუფალი დემოკრატების“ ყოფილმა წევრმა ალექსი პეტრიაშვილმა ბიძინა ივანიშვილის ვიდეომიმართვასთან დაკავშირებით განაცხადა. ინფორმაციას სააგენტო „ინტერპრესნიუსი“ ავრცელებს.

როგორც პეტრიაშვილმა აღნიშნა, საჭიროების შემთხვევაში, მისი პოვნა არ გაუჭირდებათ.

„მე პოლიტიკურ საქმიანობას ჩამოვცილდი, თუმცა ვთვლი, რომ ჩემი თავი დიპლომატიაში ჯერ არ ამომიწურავს. მზად ვარ, საერთაშორისო ურთიერთობების კუთხით ქვეყნის სამსახურში ვიყო და მზად ვარ, რომ ამ ასპარეზზე ქვეყანას გამოვადგე. აქვე აღვნიშნავ იმასაც, რომ შემოთავაზება არ ყოფილა. მე თბილისში ვცხოვრობ, ყველამ იცის ჩემი მისამართი და არავის გაუჭირდება ჩემი პოვნა,“ - განაცხადა ალექსი პეტრიაშვილმა.

ალექსი პეტრიაშვილი 2012 წლის ოქტომბრამდე პოლიტიკური პარტია „ჩვენი საქართველო - თავისუფალი დემოკრატების“ პოლიტიკური მდივანი იყო, შემდეგ კი ქართული ოცნების კოალიციასთან ერთად ხელისუფლებაში მოვიდა,  2012 წლის ოქტომბრის საპარლამენტო არჩევნებში აირჩიეს პარლამენტის წევრად, ხოლო 25 ოქტომბერს სახელმწიფო მინისტრად დაინიშნა. 

თუმცა, მან "ქართული ოცნების" კოალიციიდან "თავისუფალი დემოკრატების" წასვლის შემდეგ, 2014 წელს მინისტრის თანამდებობა დატოვა.

ახლა ევროპასთან და ევროატლანტიკურ სტრუქტურებში ინტეგრაციის საკითხებში ყოფილი სახელმწიფო მინისტრი ალექსი პეტრიაშვილი გადაცემა “საქმიანი დილის” თანაწამყვანია.

დღეს გავრცელდა ვიდეო, რომ პარტია "ქართული ოცნება - დემოკრატიული საქართველოს" თავმჯდომარე ბიძინა ივანიშვილი საქართველოს მოქალაქეებს მიმართავს. ივანიშვილის განცხადებით, მას ესმის საქართველოს მოქალაქეების, მათი გულისტკივილისა და იმედგაცრუების. 

ივანიშვილმა საქართველოს მოქალაქეებისადმი ვიდეომიმართვაში ქართული ოცნების "ძველ გვარდიასაც" მიმართა.

"მინდა მივმართო „ქართული ოცნების“ ძველ გვარდიას, მათ, ვინც შეუძლებელი შეძლეს 2012 წლის იმ ისტორიულ დღეებში: საქართველოს კიდევ ერთხელ დასჭირდა თქვენი ერთგულება და გამოცდილება, თქვენი სამოქალაქო გმირობა. მე ვიცი თქვენი გულისტკივილი, მე ვიცი თქვენი გაბრაზების ყველა მიზეზი. გაძლევთ პირობას, რომ ყველა პატრიოტი იპოვის საკუთარ ადგილს თავისი დამსახურების მიხედვით ჩვენს ერთიან ოჯახში, არავის ღვაწლი არ დარჩება უყურადღებოდ!", - განაცხადა ბიძინა ივანიშვილმა.

საქართველოში საპრეზიდენტო არჩევნები 28 ოქტომბერს გაიმართა. 

ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების - 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ - 37,74%.

საპრეზიდენტო არჩევნების მეორე ტური საბოლოო შედეგების გამოცხადებიდან ორი კვირის ვადაში ჩატარდება. სავარაუდო თარიღად კი 2 დეკემბერი სახელდება. 

2018 წლის საპრეზიდენტო არჩევნების პირველი ტურის საბოლოო შედეგებს სრულად შეგიძლიათ გაეცნოთ ამ ბმულზე.