მამუკა მდინარაძე: მოსამართლეთა სიას ქართული ოცნების ხელმძღვანელი არ ლობირებს

ფრაქცია "ქართული ოცნების" თავმჯდომარე მამუკა მდინარაძე აცხადებს, რომ უზენაესი სასამართლოს მოსამართლეობის 10-კაციან სიას, რომელიც იუსტიციის საბჭომ წარადგინა, პარტიის ხელმძღვანელი არ ლობირებს. ამის შესახებ მდინარაძემ კაჭრეთში, უმრავლესობის შეხვედრის ფარგლებში ჟურნალისტებთან თქვა. ინფორმაციას სააგენტო "ინტერპრესნიუსი" ავრცელებს.

მამუკა მდინარაძის განცხადებით, კანდიდატთა სიის გაწვევის პრეროგატივა პარლამენტს არ აქვს, ეს იუსტიციის უმაღლესი საბჭოს გადასაწყვეტია. 

"რაც შეეხება მოსამართლეების სიას, ჩვენ ვთქვით და პარლამენტმა მიიღო ასეთი გადაწყვეტილება, რომ დაჩქარებულ რეჟიმში ამ საკითხის განხილვა არ იქნებოდა სწორი და გადაწყვეტილებაც იყო შესაბამისი. არც ერთი სიტყვა, არც ერთი თუნდაც შიდა კამათი არ შეხებია კონკრეტულ პერსონებს. უფრო მეტიც, როგორც პარტიის თავმჯდომარის, ასევე საპარლამენტო ხელმძღვანელობის მხრიდან საუბარი იყო არა იმაზე, რომ ვინმეს დავუჭიროთ თუ არა მხარი, არამედ იმაზე, რომ ეს არის ინდივიდუალურად გადასაწყვეტი. არასწორია იმაზე საუბარი 10-კაციან სიას უჭერს თუ არა ვინმე მხარს. ყველა მათგანთან დაკავშირებით კონკრეტული და ინდივიდუალური გადაწყვეტილებები უნდა გამოვიდეს“, - განაცხადა მდინარაძემ და დასძინა, რომ უმრავლესობამ ჯერ იმაზე უნდა იმსჯელოს, გაიწეროს თუ არა შესაბამისი კრიტერიუმები მოსამართლეების შესარჩევად.

"სიაზე და კონკრეტულ პერსონებზე საუბარი არის ძალიან ნაადრევი და ეს თემაც ძალიან ნაადრევად არის წამოწეული წინა პლანზე. არანაირ სიას დამერწმუნეთ, პარტიის ხელმძღვანელი არ ლობირებს. მისი აზრიც იყო, რომ ინდივიდუალურად გადასაწყვეტია კონკრეტული პერსონების მიმართ მსჯელობა და შესაბამისი გადაწყვეტილების მიღება საქართველოს პარლამენტის მიერ. ეს არის პარლამენტის საქმე და არავინ ამაში არ ჩარეულა, არავითარი მოწოდება არ ყოფილა მხარი დაეჭირათ ან არ დაეჭირათ", - თქვა მამუკა მდინარაძემ. 

დღეს უმრავლესობის წევრმა ბექა ნაცვლიშვილმა განაცხადა, რომ უზენაესის მოსამართლეების სიის დამტკიცების შემთხვევაში ის უმრავლესობას დატოვებს.

უზენაესი სასამართლოს მოსამართლეთა 10-კაციანმა სიამ საპარლამენტო უმრავლესობაში დაპირისპირება გამოიწვია. როგორც ეკა ბესელია ამბობს, პარლამენტში ამ სიის განხილვის პროცესის შესაჩერებლად მან იურიდიულ საკითხთა კომიტეტის თავმჯდომარის თანამდებობა დატოვა. თუმცა ამ განცხადებას არ ეთანხმება პარლამენტის თავმჯდომარე ირაკლი კობახიძე. ის ამბობს, რომ სიის განხილვის შეჩერება ბესელიას მიერ პოსტის დატოვებას არ შეეძლო. 

24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

კანდიდატები არიან: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე.