კობახიძე: საერთო მიზანია, მოსამართლეთა დამოუკიდებლობის განმტკიცება

საქართველოს პარლამენტის თავმჯდომარემ სასამართლო რეფორმის სამუშაო ჯგუფის შეხვედრაზე განაცხადა, რომ მათი საერთო მიზანია, დამოუკიდებელი სასამართლოსა და მოსამართლეთა დამოუკიდებლობის განმტკიცება.

"ჩვენი დღევანდელი შეხვედრის მიზანი გახლავთ იმ პროცედურისა და კრიტერიუმების განხილვა, რომელიც დაკავშირებულია უზენაესი სასამართლოს მოსამართლეობის კანდიდატების შერჩევასთან და არჩევასთან და ამას დაეთმობა მთლიანად, დღევანდელი შეხვედრა. მესმის, რომ კონტექსტი არის ცოტათი რთული, თუმცა, იმედი მაქვს, რომ ამ რთული კონტექსტის მიუხედავად, ჩვენ შევძლებთ კონსტრუქციულ გარემოში, სამართლებრივი განხილვის ორგანიზებას პროცედურასა და კრიტერიუმებთან დაკავშირებით. უნდა შემუშავდეს ის პროცედურა და კრიტერიუმები, რომელთა საფუძველზეც აირჩევიან უზენაესი სასამართლოს მოსამართლეები საქართველოს პარლამენტის მიერ იუსტიციის უმაღლესი საბჭოს წარდგინებით.

შეგვიძლია, წავიდეთ სხვა მიდგომით, არ დავაინიციროთ საერთოდ კანონპროექტი, დაველოდოთ ამ ნორმებზეც პოზიციების შეჯერებას და ამის შემდეგ დავაინიციროთ ეს საკითხი. ამასთან დაკავშირებით, შეიძლება გვქონდეს ინდივიდუალური კონსულტაციები და ამის საფუძველზე მივიღოთ ეს გადაწყვეტილება“,- განაცხადა პარლამენტის თავმჯდომარემ.

განცხადება გააკეთა საპარლამენტო უმრავლესობის წევრმა ანრი ოხანაშვილმაც.

"ჩვენ აქ მოსულები ვართ იმისთვის, რომ ჯერ მოვისმინოთ ყველას მოსაზრება და გავუზიაროთ ჩვენი პოზიციებიც. საუბარი არის იმაზე, რომ იუსტიციის უმაღლეს საბჭოშიც კანდიდატების წარდგენის პროცესი უნდა იყოს მაქსიმალურად გამჭვირვალე. პროცესსა და პროცედურებზე, უკვე სამუშაო ჯგუფის ფარგლებში ვიმსჯელებთ“, - განცხადა ანრი ოხანაშვილმა.

საპარლამენტო უმრავლესობის ერთ-ერთმა ლიდერმა, დეპუტატმა დავით მათიკაშვილმა განაცხადა, რომ იუსტიციის უმაღლესი საბჭოს წევრების დანიშვნას კონსტიტუციის ახალი რედაქცია აწესრიგებს, რომელიც მოწონებულია ვენეციის კომისიის მიერ. საპარლამენტო უმრავლესობის წევრის განცხადებით, სამწუხაროა, რომ საინიციატივო ჯგუფის შეხვედრას არ ესწრება მესამე სექტორი და რომ ისინი თვითნებურად ჩამოშორდნენ პროცესს.

"სამწუხაროა, რომ არასამთავრობო ორგანიზაციის ნაწილმა მიიღო ეს გადაწყვეტილება, რაც მიიღეს. რეალურად ჩვენ გვახსოვს პროცესები, როდესაც ხდებოდა რიგი არასამთავრობოების გამოთიშვა პროცესებიდან საკუთარი ნებით. აქ არა თუ გაუცხოება, ყველა დაინტერესებული პირი უნდა იყოს ჩართული და ასეც იყო, ყველასთან იყო მოწვევა გაგზავნილი. რაც შეეხება არასამთავრობოების მოთხოვნას, ეს მოთხოვნა კონსტიტუციის ფარგლებს სცილდება. კონსტიტუციას გააჩნია ახალი რედაქცია, რომელიც მოწონებულია ყველაზე კომპეტენტური საერთაშორისო ორგანიზაციის, ვენეციის კომისიის მიერ", - განაცხადა დავით მათიკაშვილმა.

საქართველოს პარლამენტის თავმჯდომარის, ირაკლი კობახიძის ხელმძღვანელობით შეხვედრა იმართება, რომელზეც უზენაესი სასამართლოს მოსამართლეობის კანდიდატების დასახელების პროცედურასა და კრიტერიუმებზე მსჯელობენ.

სამუშაო ჯგუფში შედიან: საპარლამენტო უმრავლესობის, იურიდიულ საკითხთა კომიტეტის და იუსტიციის უმაღლესი საბჭოს წევრები. განხილვის პროცესს პროტესტის ნიშნად არასამთავრობო ორგანიზაციის წარმომადგენლები არ ესწრებიან.

სასტუმრო „რედისონ ბლუ ივერიასთან“ მოსამართლეთა შესარჩევი სამუშაო ჯგუფის შეხვედრის პარალელურად მოქალაქეთა საინიციატივო ჯგუფის საპროტესტო აქცია გაიმართა. აქციაზე შეკრებილები იუსტიციის უმაღლესი საბჭოს 11 წევრის გადადგომას ითხოვდნენ, რომლებმაც მურუსიძის უვადოდ დანიშვნას დაუჭირეს მხარი და უზენაესი სასამართლოს მოსამართლეობის კანდიდატების სიას მისცეს ხმა.

ლევან მურუსიძეს აქციის მონაწილეები შეძახილებით დახვდნენ.

21 იანვარს უზენაესის მოსამართლეობის სადავო კანდიდატებმა მოსამართლეებად არჩევაზე უარი თქვეს. 24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

ამ საკითხთან დაკავშირებით ორი დღის განმავლობაში კონსულტაციები და შეხვედრები იმართებოდა უმრავლესობაში, რომელსაც პარტიის თავმჯდომარე ბიძინა ივანიშვილი ხელმძღვანელობდა.