ნაციონალებმა სასამართლო რეფორმის სამუშაო ჯგუფის შეხვედრა დატოვეს

საქართველოს პარლამენტის თავმჯდომარის ირაკლი კობახიძის ხელმძღვანელობით სასამართლო რეფორმის სამუშაო ჯგუფის შეხვედრა მიმდინარეობს. მედიასთან კომენტარი გააკეთა დეპუტატმა ლევან გოგიჩაიშვილმა.

"მნიშვნელოვანი საკითხი დაისვა, იცით, რომ უმრავლესობაში არის კონსენსუსი მიღწეული უვადოდ მოსამართლეების დანიშვნის პროცესზე მორატორიუმის გამოცხადებასთან დაკავშირებით. ეს პროცესი უნდა შეჩერდეს. დღეს ეს პროცესი გაჟღერდა. ჩვენ ვფიქრობთ, რომ პარლამენტის მხრიდან იუსტიციის უმაღლესი საბჭოსთვის ამ განწყობის გადაცემა, ბუნებრივია, სასიამოვნო არ არის. ისინი თვლიან, რომ ამ პროცესზე ექსკლუზიური უფლება მათ აქვთ, მაგრამ დღევანდელი მოცემულობა და საზოგადოების დაკვეთა სხვა არის. ერთ-ერთი მთავარი დაკვეთა არის ის, რომ შეჩერდეს უვადო დანიშვნები, რაც ორი გზით არის შესაძლებელი - გაიაზროს იუსტიციის უმაღლესმა საბჭომ პროცესი და თვითონ შეაჩეროს უვადოდ დანიშვნა კრიტერიუმების გაწერამდე, ან პარლამენტმა შეაჩეროს უვადო დანიშვნები.

ასევე მნიშვნელოვანია იუსტიციის უმაღლესი სკოლის რეფორმა, რადგან თუ ახლა ყველა მოსამართლე უვადოდ დაინიშნა, რაღა აზრი აქვს ამ რეფორმას? ეს არის იუსტიციის უაღლესი საბჭოსთვის არასასიამოვნო ინფორმაცია, მაგრამ მოუწევთ ამ ფაქტზე შეგუება. ყველამ ერთად უნდა გავაკონტროლოთ, რომ ხვალ ჩუმად არ შეიკრიბონ და რამე სია არ გაიტანონ. იცით, რომ წარმოდგენილია 48 მოსამართლე და ეს პროცესი უნდა გაჩერდეს. მოვუწოდებთ მათ, დაანებობ თავი ხალხთან კონფლიქტს, ყველაზე მნიშვნელოვანი ახლა კონსენსუსია. თუ პროცესს თვითონ არ შეაჩერებენ, ეს სასამართლოს დაარტყამს",- განაცხადა გოგიჩაიშვილმა.

"ნაციონალურმა მოძრაობამ" სასამართლო რეფორმის სამუშაო ჯგუფის შეხვედრა დატოვა. ამის შესახებ პარტიის წევრმა თინა ბოკუჩავამ ჟურნალისტებს განუცხადა. 

"მნიშვნელოვანია, რომ ასეთ შეხვედრებზე ვესაუბრებოდეთ არა კრებსით მურუსიძეს, არამედ, ყველა იმ ადამიანს, რომელიც წლების განმავლობაში მუშაობს მართლმსაჯულების მისაღწევად,"- თქვა ბოკუჩავამ.

საქართველოს პარლამენტის თავმჯდომარის, ირაკლი კობახიძის ხელმძღვანელობით შეხვედრა იმართება, რომელზეც უზენაესი სასამართლოს მოსამართლეობის კანდიდატების დასახელების პროცედურასა და კრიტერიუმებზე მსჯელობენ.

სამუშაო ჯგუფში შედიან: საპარლამენტო უმრავლესობის, იურიდიულ საკითხთა კომიტეტის და იუსტიციის უმაღლესი საბჭოს წევრები. განხილვის პროცესს პროტესტის ნიშნად არასამთავრობო ორგანიზაციის წარმომადგენლები არ ესწრებიან.

სასტუმრო „რედისონ ბლუ ივერიასთან“ მოსამართლეთა შესარჩევი სამუშაო ჯგუფის შეხვედრის პარალელურად მოქალაქეთა საინიციატივო ჯგუფის საპროტესტო აქცია გაიმართა. აქციაზე შეკრებილები იუსტიციის უმაღლესი საბჭოს 11 წევრის გადადგომას ითხოვდნენ, რომლებმაც მურუსიძის უვადოდ დანიშვნას დაუჭირეს მხარი და უზენაესი სასამართლოს მოსამართლეობის კანდიდატების სიას მისცეს ხმა.

ლევან მურუსიძეს აქციის მონაწილეები შეძახილებით დახვდნენ.

21 იანვარს უზენაესის მოსამართლეობის სადავო კანდიდატებმა მოსამართლეებად არჩევაზე უარი თქვეს. 24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

ამ საკითხთან დაკავშირებით ორი დღის განმავლობაში კონსულტაციები და შეხვედრები იმართებოდა უმრავლესობაში, რომელსაც პარტიის თავმჯდომარე ბიძინა ივანიშვილი ხელმძღვანელობდა.