მურუსიძე კაკაბაძეს: გირგვლიანის მკვლელობაში ბრალდებულები ციხეში მე ჩავსვი

უზენაესის მოსამართლეების წარდგენის წესზე პირველი სამუშაო შეხვედრა იმართება. შეხვედრაზე მისულ ლევან მურუსიძეს საპროტესტო აქციაზე არასამთავრობო სექტორის წარმომადგენლები შეძახილებით დახვდნენ.

აქციის მონაწილეები იუსტიციის საბჭოს იმ წევრების გადადგომას ითხოვენ, ვინც ლევან მურუსიძის უვადოდ გამწესებას დაუჭირეს მხარი.

აქციაზე ირაკლი კაკაბაძესა და ლევან მურუსიძეს შორის გირგვლიანის საქმის გამო სიტყვიერი დაპირისპირება მოხდა. როგორც მურუსიძემ განმარტა გირგვლიანის მკვლელები ციხეში მან ჩასვა, მიხეილ სააკაშვილმა სასჯელი გაუნახევრა, ხოლო შემდეგ პირობით ვადამდე გაუშვეს, რაშიც მურუსიძის თქმით, მას ბრალი არ მიუძღვის.

მურუსიძე სამუშაო ჯგუფის შეხვედრაში „მოსამართლეთა ასოციაციის“ კვოტით მონაწილეობს.

"შეიძლება გამოაცხადონ უნდობლობა, შეიძლება ჰქონდეთ თავიანთი პოზიცია, ასევე თითოეული მოსამართლისა და რაღაც მოვლენების მიმართ, მაგრამ ის, რომ არასამთავრობო სექტორი ითხოვდეს, გადადგეს სასამართლო ხელისუფლება, ეს არ ჯდება არც კონსტიტუციაში, არც კანონში. ეს საღ აზრს მოკლებულია. 

წინასწარ აქ ჩემი წინადადებებით ნამდვილად არ მოვსულვარ. მოვედი, რათა მოვუსმინო ყველა მხარეს და რაც რაცინალური და სწორი იქნება სასამართლოსა და ქვეყნის ინტერესებიდან გამომდინარე, იმას დავუჭერ მხარს. კი მაქვს ჩემი პოზიციები, მაგრამ მინდა, მოვისმინო. ყველას გავეცნობი და იმის მიხედვით მექნება ჩემი პოზიცია“, – აღნიშნა ლევან მურუსიძემ.

საქართველოს პარლამენტის თავმჯდომარის, ირაკლი კობახიძის ხელმძღვანელობით შეხვედრა იმართება, სადაც უზენაესი სასამართლოს მოსამართლეობის კანდიდატების დასახელების პროცედურასა და კრიტერიუმებზე მსჯელობენ.

სამუშაო ჯგუფში შედიან: საპარლამენტო უმრავლესობის, იურიდიულ საკითხთა კომიტეტის და იუსტიციის უმაღლესი საბჭოს წევრები. განხილვის პროცესს პროტესტის ნიშნად არასამთავრობო ორგანიზაციის წარმომადგენლები არ ესწრებიან.

21 იანვარს უზენაესის მოსამართლეობის სადავო კანდიდატებმა მოსამართლეებად არჩევაზე უარი თქვეს.

24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

ამ საკითხთან დაკავშირებით ორი დღის განმავლობაში კონსულტაციები და შეხვედრები იმართებოდა უმრავლესობაში, რომელსაც პარტიის თავმჯდომარე ბიძინა ივანიშვილი ხელმძღვანელობდა.