2024 წლამდე მოსამართლეების უვადოდ გამწესების შესახებ გადაწყვეტილება არ მიღებულა

„ჩვენ გვქონდა მსჯელობა პრინციპებთან დაკავშირებით, როგორ უნდა გაიწეროს კრიტერიუმები. ეს იყო ჩვენი მიზანი და ამაზე მიიღებს პარლამენტი საბოლოო კანონს. დაგიდასტურებთ, რომ იყო განხილვა მოსამართლეების უვადოდ გამწესების 2024 წლამდე გადავადების შესახებ, თუმცა გადაწყვეტილება ამასთან დაკავშირებით არ არის ჯერ მიღებული“, - განაცხადა პარლამენტის თავმჯდომარე ირაკლი კობახიძემ. 

„ბევრი სპეკულაციები მოვისმინე კლანთან დაკავშირებით, თითქოს ვლობირებდი იმ პირველ სიას, რომელიც იყო წარმოდგენილი. მე ცალსახად მინდა აღვნიშნო რომ ამასთან კავშირი არ მაქვს“, - აღნიშნა ირაკლი კობახიძემ. 

სასამართლო რეფორმის სამუშაო ჯგუფის სამუშაო შეხვედრა ირაკლი კობახიძის თქმით, ევროსაბჭოს დაფინანსებით გაიმართა. 

პარლამენტის თავმჯდომარემ სასტუმრო „რედისონ ბლუ ივერიასთან“ მოსამართლეთა შესარჩევი სამუშაო ჯგუფის შეხვედრის პარალელურად მოქალაქეთა საინიციატივო ჯგუფის საპროტესტო აქციაზეც გააკეთა კომენტარი. 

„იქ იყვნენ ადამიანები რომლებიც გულწრფელად გამოხატავდნენ პოზიციას, თუმცა იყვნენ ადამიანები, რომელთა გულწრფელობაში ეჭვი მეპარება. იყო არასამთავრობო ორგანიზაციის წარმომადგენელი, რომელიც ნაციონალურ მოძრაობასთან მუშაობის 15-წლიანი სტაჟი აქვს“, - აღნიშნა კობახიძემ. 

„გრძელდება დისკუსიები უმრავლესობის ფორმატში. საერთო ამოცანაა გუნდი იყოს ერთიანი. პოლიტიკოსი დაცლილი უნდა იყოს სუბიექტური ინტერესებისგან.

მზადებაა საპარლამენტო არჩევნებისთვის. გუნდი არის გასაახლებელი. ასევე ბევრი რამეა გასაახლებელი სახელმწიფო პოლიტიკის მხრივ, რათა ჩვენი პოლიტიკა გახდეს უკეთესი. მთავარია გუნდის ერთგულება, პროფესიონალიზმი და წესების დაცვა“,  - განაცხადა ირაკლი კობახიძემ სამომავლო საპარლამენტო მუშაობის შესახებ საუბრისას.

დღეს სასამართლო რეფორმის სამუშაო ჯგუფის სამუშაო შეხვედრა გაიმართა, რომელიც იუსტიციის საბჭოს არამოსამართლე წევრებმა და ნაციონალურმა მოძრაობამ პროტესტის ნიშნად დატოვა. 

სასტუმრო „რედისონ ბლუ ივერიასთან“ მოსამართლეთა შესარჩევი სამუშაო ჯგუფის შეხვედრის პარალელურად მოქალაქეთა საინიციატივო ჯგუფის საპროტესტო აქცია გაიმართა. აქციაზე შეკრებილები იუსტიციის უმაღლესი საბჭოს 11 წევრის გადადგომას ითხოვდნენ, რომლებმაც მურუსიძის უვადოდ დანიშვნას დაუჭირეს მხარი და უზენაესი სასამართლოს მოსამართლეობის კანდიდატების სიას მისცეს ხმა.

ლევან მურუსიძეს აქციის მონაწილეები შეძახილებით დახვდნენ.

21 იანვარს უზენაესის მოსამართლეობის სადავო კანდიდატებმა მოსამართლეებად არჩევაზე უარი თქვეს. 24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

ამ საკითხთან დაკავშირებით ორი დღის განმავლობაში კონსულტაციები და შეხვედრები იმართებოდა უმრავლესობაში, რომელსაც პარტიის თავმჯდომარე ბიძინა ივანიშვილი ხელმძღვანელობდა.