გვრიტიშვილი: ანა დოლიძისა და ნაზი ჯანეზაშვილის მიზანი დღევანდელი შეხვედრის ჩაშლაა

 იუსტიციის უმაღლესი საბჭოს მოსამართლე წევრმა დიმიტრი გვრიტიშვილმა განაცხადა, რომ  ანა დოლიძისა და ნაზი ჯანეზაშვილის მიზანი დღევანდელი შეხვედრის ჩაშლაა.

"ჩემი აზრით, ამ ფორმატის ყველა მონაწილე სუბიექტს ანა დოლიძემ შეურაცხყოფა მიაყენა, მათ შორის, საერთაშორისო დონორი ორგანიზაციების წარმომადგენლებს, როცა თქვა, რომ თურმე მაფიოზური შეთანხმებით ჩამოყალიბდა აღნიშნული ფორმატი და მისი მონაწილეები განისაზღვრა შეთანხმებით. ამ ფორმატში თავიდანვე მონაწილეობდნენ ჩვენი უცხოელი პარტნიორები. ასეთი სიტყვების სროლა ანა დოლიძეს სჩვევია. ანა დოლიძეს და ნაზიბროლა ჯანეზაშვილს შეუძლიათ გამობრძანდნენ და შეურთდნენ აქციას, რომელიც გარეთ მიმდინარეობს“, - განაცხადა გვრიტიშვილმა.

მანამდე ნაზი ჯანეზაშვილმა და ანა დოლიძემ სასამართლო რეფორმის სამუშაო ჯგუფის შეხვედრა პროტესტის ნიშნად დატოვეს.

"დღეს სამუშაო ჯგუფის შეხვედრაზე საბჭომ თუ მურუსიძემ მოგვიყვანეს ის ადამიანები, ვინც უშუალოდ იყო იმ 10-კაციან სიაში, მათ შორის მოსამართლეები: ქადაგიძე, ცისკაძე, ალანია და სხვები. ჩემთვის მიუღებელია, რომ ადამიანები, რომლებიც თავის დროზე დათანხმდნენ ამ სიაში ყოფნას და ამ ფორმით შემდგომ უკვე პარლამენტში წარდგენას, მსჯელობდნენ კრიტერიუმებზე და პროცედურებზე. ჩემთვის ცალსახაა, რომ მათ აქვთ პირადი დაინტერესება, რომ ისევ მოხვდნენ სიაში და შემუშავდეს ისეთი პროცედურები, რაც მათ საშუალებას მისცემს პარლამენტში კიდევ ერთხელ იყვნენ წარდგენილები და მათ სასარგებლოდ მოხდეს კენჭისყრა. ჩემთვის პირადად კატეგორიულად მიუღებელია ადამიანებთან ერთად ვიმსჯელო პროცედურებზე, რომლებიც დათანხმდნენ სიაში ყოფნას და მიიღეს მონაწილეობა პროცესში, რომელსაც პროცესი საერთოდ არ ჰქვია. კატეგორიულად მოვითხოვ, ან შეიქმნას ფორმატი, რომელიც სამართლიანი იქნება, არ გაჩნდება კითხვები, ან ამ ჯგუფში ჩემს ყოფნას აზრი არ აქვს",- განაცხადა ჯანეზაშვილმა.

სასამართლო რეფორმის სამუშაო ჯგუფის შეხვედრა დატოვეს ნაციონალებმაც.

საქართველოს პარლამენტის თავმჯდომარის, ირაკლი კობახიძის ხელმძღვანელობით შეხვედრა იმართება, რომელზეც უზენაესი სასამართლოს მოსამართლეობის კანდიდატების დასახელების პროცედურასა და კრიტერიუმებზე მსჯელობენ.

სამუშაო ჯგუფში შედიან: საპარლამენტო უმრავლესობის, იურიდიულ საკითხთა კომიტეტის და იუსტიციის უმაღლესი საბჭოს წევრები. განხილვის პროცესს პროტესტის ნიშნად არასამთავრობო ორგანიზაციის წარმომადგენლები არ ესწრებიან.

სასტუმრო „რედისონ ბლუ ივერიასთან“ მოსამართლეთა შესარჩევი სამუშაო ჯგუფის შეხვედრის პარალელურად მოქალაქეთა საინიციატივო ჯგუფის საპროტესტო აქცია გაიმართა. აქციაზე შეკრებილები იუსტიციის უმაღლესი საბჭოს 11 წევრის გადადგომას ითხოვდნენ, რომლებმაც მურუსიძის უვადოდ დანიშვნას დაუჭირეს მხარი და უზენაესი სასამართლოს მოსამართლეობის კანდიდატების სიას მისცეს ხმა.

ლევან მურუსიძეს აქციის მონაწილეები შეძახილებით დახვდნენ.

21 იანვარს უზენაესის მოსამართლეობის სადავო კანდიდატებმა მოსამართლეებად არჩევაზე უარი თქვეს. 24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

ამ საკითხთან დაკავშირებით ორი დღის განმავლობაში კონსულტაციები და შეხვედრები იმართებოდა უმრავლესობაში, რომელსაც პარტიის თავმჯდომარე ბიძინა ივანიშვილი ხელმძღვანელობდა.