კობახიძე: გზავნილს, რომ მოსამართლეთა ათკაციან სიას ვლობირებდი, სინამდვილესთან კავშირი არ აქვს

პარლამენტის თავმჯდომარის ირაკლი კობახიძის განცხადებით, ინფორმაცია იმის შესახებ, რომ ის მოსამართლეთა 10-კაციან სიას ლობირებდა სიმართლე არ შეესაბამება. ამის შესახებ კომენტარი პარლამენტის თავმჯდომარემ სასამართლო რეფორმის სამუშაო ჯგუფის შეხვედრის შემდეგ გააკეთა.

"გზავნილი, რომ მოსამართლეთა ათკაციან სიას ვლობირებდი, პოლიტიკურია და არანაირი კავშირი არ აქვს სინამდვილესთან - ამაზე ვიღებ სრულ პასუხისმგებლობას.

ეს არის პოლიტიკური გზავნილი, რომელიც დატრიალდა სამწუხაროდ და რომელსაც არანაირი კავშირი არ აქვს სინამდვილესთან. ამასთან დაკავშირებით, მე ვიღებ სრულ პასუხისმგებლობას", - განაცხადა ირაკლი კობახიძემ.

კობახიძის თქმით, სამუშაო ჯგუფის პირველ შეხვედრაზე პრინციპების დონეზე განიხილეს კრიტერიუმებთან და პროცედურასთან დაკავშირებით წარმოდგენილი წინადადებები, შემდეგ შეხვედრაზე თითოეულ ნორმასთან დაკავშირებით გაგრძელდება მსჯელობა, რომელიც კანონპროექტში უნდა აისახოს, რომელიც სამუშაო ჯგუფის მიერ მომზადდება და ინიცირდება პარლამენტში.

როგორც ირაკლი კობახიძემ ჟურნალისტებთან საუბრისას აღნიშნა, დღევანდელი შეხვედრის მიზანი პრინციპების განხილვა იყო. მისივე თქმით, საუბარი იყო პრინციპული მნიშვნელობის ყველა დეტალზე.

„რეალურად, იყო საუბარი ყველა დეტალზე, რომელიც პრინციპული მნიშვნელობისაა. დაწყებული იმით, თუ რამდენად უნდა იყოს ღია ის კონკურსი, რომელიც გამოცხადდება, შემდეგ როგორ უნდა იყოს პროცესი იუსტიციის უმაღლეს საბჭოში. როგორ უნდა იყოს მიღებული გადაწყვეტილება საბჭოს მიერ. როგორ უნდა გაგრძელდეს ეს პროცესი შემდეგ პარლამენტში, რამდენი კანდიდატი როგორ უნდა იყოს წარმოდგენილი. ამ ყველაფერზე გვქონდა ჩვენ საუბარი. დღეს, ბუნებრივია, გადაწყვეტილებებს ვერ გამოვაცხადებთ, გამომდინარე იქიდან, რომ მხოლოდ პრინციპების დონეზე გვქონდა საუბარი ამასთან დაკავშირებით. მეორე შეხვედრაზე უკვე გვექნება საშუალება, რომ დეტალურად წარმოგიდგინოთ ის გადაწყვეტები, რომელიც იქნება შემოთავაზებული კრიტერიუმებთან და პროცედურასთან დაკავშირებით”, - განაცხადა პარლამენტის თავმჯდომარემ.

დღეს სასამართლო რეფორმის სამუშაო ჯგუფის სამუშაო შეხვედრა გაიმართა, რომელიც იუსტიციის საბჭოს არამოსამართლე წევრებმა და ნაციონალურმა მოძრაობამ პროტესტის ნიშნად დატოვა. 

სასტუმრო „რედისონ ბლუ ივერიასთან“ მოსამართლეთა შესარჩევი სამუშაო ჯგუფის შეხვედრის პარალელურად მოქალაქეთა საინიციატივო ჯგუფის საპროტესტო აქცია გაიმართა. აქციაზე შეკრებილები იუსტიციის უმაღლესი საბჭოს 11 წევრის გადადგომას ითხოვდნენ, რომლებმაც მურუსიძის უვადოდ დანიშვნას დაუჭირეს მხარი და უზენაესი სასამართლოს მოსამართლეობის კანდიდატების სიას მისცეს ხმა.

ლევან მურუსიძეს აქციის მონაწილეები შეძახილებით დახვდნენ.

21 იანვარს უზენაესის მოსამართლეობის სადავო კანდიდატებმა მოსამართლეებად არჩევაზე უარი თქვეს. 24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

ამ საკითხთან დაკავშირებით ორი დღის განმავლობაში კონსულტაციები და შეხვედრები იმართებოდა უმრავლესობაში, რომელსაც პარტიის თავმჯდომარე ბიძინა ივანიშვილი ხელმძღვანელობდა.