პრემიერმინისტრი „თიბისი ბანკის“ საქმეს ეხმაურება

პრემიერმინისტრი მამუკა ბახტაძე "თიბისი ბანკის" საკითხზე აკეთებს კომენტარს. მთავრობის მეთაურის განცხადებით, "თიბისი" ძლიერი ფინანსური ინსტიტუტია არა მხოლოდ ფინანსური სექტორისათვის, არამედ ეროვნული ეკონომიკისთვის. ბახტაძის განმარტებით, ეროვნული ბანკის მხრიდან ობიექტური ზედამხედველობის პროცესი მიმდინარეობდა.

„ამავე დროს, ვფიქრობ, ის ერთობლივი განცხადება, რომელიც გააკეთა თიბისი ბანკმა და ეროვნულმა ბანკმა, გამოხატავს იმ სულისკვეთებას,რასთანაც რეალურად ჩვენ საქმე გვაქვს. ეროვნული ბანკის მხრიდან ობიექტური ზედამხედველობის პროცესი მიმდინარეობდა, რა თქმა უნდა, ეს არის დადებითი სიგნალი, რომ ჩვენ მოვისმინეთ ერთობლივი განცხადება თიბისი და ეროვნული ბანკის მხრიდან. ფიჩმაც აღნიშნა, რომ ეროვნული ბანკი ატარებს სწორ პოლიტიკას, და ის, რომ ჩვენი საბანკო ფინანსური სექტორი არის ძალიან მდგრადი. ეს არის კონკრეტული ფაქტი. დანარჩენი ჩემი აზრით, ეს არის პოლიტიკური სპეკულაციის საგანი. რა თქმა უნდა, ჩვენ ვცხოვრობთ დემოკრატიაში, ნებისმიერ ადამიანს აქვს იმის საშუალება, რომ მისცეს შეფასება ნებისმიერ საკითხს. ჩვენ მოვისმენთ ალბათ დღეს კომიტეტზე თითოეული ადამიანის შეფასებას. მე ზოგადად მივესალმები ამ პროცესს, კითხვები როცა არსებობს, მასზე უნდა იყოს პასუხებიც.

რაც შეეხება იმას, რომ ეროვნული ბანკის პრეზიდენტი არ მივა პარლამენტში, ეს პროცედურული საკითხია, ეროვნული ბანკი დამოუკიდებელი სტრუქტურაა, არ ვარ მე ნამდვილად ამ თემის ექსპერტი, ეროვნული ბანკის პრეზიდენტი უნდა მივიდეს, არ უნდა მივიდეს, ან როდის უნდა მივიდეს. პარლამენტის წინაშე არსებობს ანგარიშვალდებულება, მაგრამ ამასთან ერთად ჩვენ ვიხილეთ, რომ ეროვნულმა ბანკმა და თიბისი ბანკმა გააკეთეს ერთობლივი განცხადება, მე პირადად, როგორც მოქალაქე, ამას მივესალმები ყოველთვის", - აღნიშნა მამუკა ბახტაძემ და დასძინა, რომ გავრცელებული ინფორმაცია, თითქოს მან მამუკა ხაზარაძისგან წერილი მიიღო, სიმართლე არ არის.

„მამუკა ხაზარაძისგან ოფიციალური წერილი არ მიმიღია. ის, რომ მე არ გამოვეხმაურე, რეალობას არ შეესაბამება. მე ბიზნესასოციაციის წარმომადგენლებთან, რომლის წევრიც გახლავთ ბანკი, მქონდა შეხვედრა მათივე ინიციატივით", - აღნიშნა ბახტაძემ.

21 თებერვალს ცნობილი გახდა, რომ „თიბისი ბანკმა" ეროვნული ბანკის წინააღმდეგ სასამართლო დავა შეწყვიტა და განაცხადა, რომ გადაიხდის ეროვნული ბანკის მიერ ჯარიმის სახით დაკისრებულ 1 მილიონ ლარს. ასევე „თიბისი ბანკის“ სამეთვალყურეო საბჭოს თავმჯდომარე მამუკა ხაზარაძემ განაცხადა, რომ ბანკიდან მიდის. 

საქართველოს გენერალური პროკურატურა „თიბისი ბანკის საქმეზე“ დაკავშირებით საქმეს უკანონო შემოსავლის ლეგალიზაციის ფაქტზე იძიებს. საუბარია 17 მილიონ დოლარზე. 8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში "თიბისი ბანკიდან" გარკვეული დოკუმენტაცია ამოიღო.