პრემიერმინისტრი: ეროვნული ბანკი სრულიად დამოუკიდებელია

ეროვნული ბანკი გახლავთ სრულიად დამოუკიდებელი და კარგი პროფესიონალებით დაკომპლექტებული ინსტიტუტი, რომელმაც აჩვენა თავის საქმიანობაში, რომ მოქმედებს ძალიან მაღალი ეთიკური ნორმებით, – ამის შესახებ საქართველოს პრემიერმინისტრმა მამუკა ბახტაძემ დღეს გამართულ ბრიფინგზე განაცხადა.

როგორც მამუკა ბახტაძემ აღნიშნა, რაც ბოლო დღეების განმავლობაში ეროვნული ბანკის მისამართით ისმოდა, სრულიად უსაფუძვლო და პოპულისტური იყო.

„ბოლო დღეების განმავლობაში მოვისმინეთ სრულიად უსაფუძვლო და პოპულისტური განცხადებები ეროვნული ბანკის მისამართით. სრული პასუხისმგებლობით მინდა განვაცხადო –  ფაქტობრივი გარემოება არის ის, რომ ეროვნული ბანკი გახლავთ სრულიად დამოუკიდებელი და კარგი პროფესიონალებით დაკომპლექტებული ინსტიტუტი. მან აჩვენა თავის საქმიანობაში, რომ მოქმედებს ძალიან მაღალი ეთიკური ნორმებით. ეს არ გახლავთ მხოლოდ ჩემი შეფასება, ეს გახლავთ შეფასება, რომელსაც ვისმენთ საერთაშორისო ფინანსური ინსტიტუტებისგან, ეს გახლავთ მთავარი არგუმენტი, რომ გვაქვს ასეთ წარმატება.

ამდენი წლის შემდეგ მოხერხდა საქართველოსთვის საინვესტიციო რეიტინგის ზრდა. ეს არის ფაქტობრივი გარემოება, დანარჩენი ყველაფერი გახლავთ პოლიტიკური სპეკულაცია. მარეგულირებლის გამართული მუშაობა არის ძალიან თვალსაჩინო. კიდევ ერთხელ მსურს, რიგითი მოქალაქის პოზიციიდან მადლობა გადავუხადო ეროვნულ ბანკს მაღალი პროფესიული საქმიანობისთვის. ბანკმა თავისი საქმიანობის ფარგლებში მიიღო გადაწყვეტილება ზედამხედველობის ნაწილში, რომელიც, როგორც ჩვენ მოვისმინეთ, იყო ძლიერი არგუმენტებით გამყარებული. კიდევ ერთხელ მსურს გამოვეხმაურო და გამოვხატო ჩემი დადებითი მიდგომა იმაზე, რომ ეროვნულმა ბანკმა და „თიბისი ბანკმა“ ერთობლივი განცხადება გააკეთეს“, – განაცხადა მამუკა ბახტაძემ.

პრემიერმინისტრმა გიორგი გახარიას მიერ მამუკა ხაზარაძის მიმართ სავარაუდო წერილზეც ილაპარაკა. „დღეს 8 მარტი რომ არ იყოს და პირველი აპრილი უფრო გამიადვილდებოდა ამ წერილზე განმარტების გაკეთება. შეიძლება ისიც მეთქვა, რომ გიორგი გახარიამ ჩემთან დაადასტურა, რომ ნამდვილად ჩაწერა, მათ შორის "არტარეასგან" ითხოვდა ან „რაგბი ტივისგან“ პოლიტიკის შეცვლას“, - აღნიშნა ბახტაძემ.

„ამ საკითხზე მოკვლევა მიმდინარეობს. ნებისმიერი მინისტრი მზადაა პასუხი გასცეს ნებისმიერ კითხვას. რაც შეეხება წერილის შინაარსს, მე გამიჭირდება ამაზე სერიოზული კომენტარის გაკეთება“, - ამბობს პრემიერმინისტრი. 

საქართველოს გენერალური პროკურატურა „თიბისი ბანკთან“ დაკავშირებით საქმეს უკანონო შემოსავლის ლეგალიზაციის ფაქტზე იძიებს. საუბარია 17 მილიონ დოლარზე. 28 თებერვალს პროკურატურამ გაასაჯაროვა ვიდეოსქემა, რომლითაც „თიბისი ბანკის“ საქმე აღწერა.

21 თებერვალს „თიბისი ბანკმა" ეროვნული ბანკის წინააღმდეგ სასამართლო დავა შეწყვიტა, ბანკმა განაცხადა, რომ ეროვნული ბანკის მიერ ჯარიმის სახით დაკისრებულ 1 მილიონ ლარს გადაიხდის. ასევე „თიბისი ბანკის“ სამეთვალყურეო საბჭოს თავმჯდომარე მამუკა ხაზარაძემ განაცხადა, რომ ბანკიდან მიდის. ბანკის სამეთვალყურეო საბჭო დატოვა ბადრი ჯაფარიძემაც.