მამუკა ხაზარაძე საქალაქო სასამართლოში გიორგი გახარიას წერილით მივიდა

წერილი თან მაქვს, - ამის შესახებ “თიბისი ბანკის“ დამფუძნებელმა მამუკა ხაზარაძემ საქალაქო სასამართლოში განაცხადა, სადაც რამდენიმე წუთის წინ, დაკითხვაზე მივიდა.

"წერილი, რა თქმა უნდა, თან მაქვს და უნდა წარვადგინო. დანარჩენს რომ გამოვალ, შემდეგ გავაკეთებ კომენტარს,“ - განაცხადა ხაზარაძემ.

„თიბისი ბანკის“ დამფუძნებელს იმ წერილთან დაკავშირებით გამოკითხავენ, რომელიც, მისი ინფორმაციით, მას შინაგან საქმეთა მინისტრმა, გიორგი გახარიამ გაუგზავნა. ამ განცხადებას შს მინისტრმა გიორგი გახარიამ უპასუხა: „მე წერილებს არ ვწერ და სათქმელს პირში ვეუბნები ყველას“.

მინისტრის განცხადებით, ამ ქვეყანაში პრივილეგირებულობა უნდა დასრულდეს. „შანტაჟის ენით საუბარი უნდა გაქრეს, ყველას მოუწევს პასუხი აგოს როგორც თავის ვალდებულებებზე, ასევე სიტყვებზე“, - განაცხადა მინისტრმა გიორგი გახარიამ.

მოგვიანებით ხაზარაძეს განცხადებას პროკურატურა გამოეხმაურა. უწყების ცნობით, „თიბისი ბანკის“ დამფუძნებელს ჩვენებაში გახარიას მუქარის წერილი არ უხსენებია.

პარალელურად ცნობილი გახდა, რომ ევროპული საქართველო ხელმოწერებს აგროვებს, რათა შეიქმნას კომისია, რომელიც მამუკა ხაზარაძის და ბადრი ჯაფარიძის საქმეს შეისწავლის.

21 თებერვალს „თიბისი ბანკმა" ეროვნული ბანკის წინააღმდეგ სასამართლო დავა შეწყვიტა, ბანკმა განაცხადა, რომ ეროვნული ბანკის მიერ ჯარიმის სახით დაკისრებულ 1 მილიონ ლარს გადაიხდის. ასევე „თიბისი ბანკის“ სამეთვალყურეო საბჭოს თავმჯდომარე მამუკა ხაზარაძემ განაცხადა, რომ ბანკიდან მიდის. ბანკის სამეთვალყურეო საბჭო დატოვა ბადრი ჯაფარიძემაც. 

საქართველოს გენერალური პროკურატურა „თიბისი ბანკის საქმეზე“ დაკავშირებით საქმეს უკანონო შემოსავლის ლეგალიზაციის ფაქტზე იძიებს. საუბარია 17 მილიონ დოლარზე. 28 თებერვალს პროკურატურამ გაასაჯაროვა ვიდეო სქემა, რომლითაც „თიბისი ბანკის“ საქმე აღწერა.