წულუკიანი თავის ადგილს ოჯახში, პოლიტიკურ ადგილს კი „ოცნების“ მხარდამჭერებში ხედავს

თეა წულუკიანმა ჟურნალისტებს განუცხადა, რომ დისკუსია, რომელიც ამჟამად მიმდინარეობს არც შეწყალების კომისიას და არც სასჯელაღსრულების იუსტიციის სამინისტროსთან გაერთიანებას არ შეეხება. ჟურნალისტების კითხვაზე, აპირებს თუ არა თანამდებობის დატოვებას და რა საკითხზე ჰქონდა უთანხმოება გუნდთან, მან აღნიშნა, რომ შიდა სამზარეულოს გარეთ გამოტანას არ აპირებს.

„როდესაც მექნება თეთრი თმა, გავიზრდი თმას და გავიკეთებ დიდ „კოსას“, თქვენ, რა თქმა უნდა, მაშინ ისევ ახალგაზრდები იქნებით, შეიძლება, ამ თემაზე ვისაუბრო. ვფიქრობ, შიდა სამზარეულოს გარეთ გამოტანა არ არის საჭირო. ეს არ ეხება არც შეწყალების საკითხს და არც იუსტიციასთან სასჯელაღსრულების გაერთიანებას. ეს არის თემა, რომელზეც ვმსჯელობთ. გვქონდა დისკუსია და ვიმედოვნებ, ეს თემა მალე დაიხურება. ხვალიდან ვგეგმავ, საქართველოს პრეზიდენტს დელეგაციის წევრის სტატუსით გავუწიო დახმარება ერევანში ოფიციალური ვიზიტის დროს. აქედან გამომდინარე, ვფიქრობ, ეს თემა უნდა დასრულდეს. ბევრი სასაუბრო აღარაფერი დარჩა. ერთი კვირა საკმარისია სამსჯელოდ, რომელი პოზიციაა სწორი. მესმის, რომ მედიის საქმეა კითხვები დასვას, მაგრამ საუბარი მქონდა აღმასრულებელი ხელისუფლების ფარგლებში. თუ დღეს ჩვენ მივაღწიეთ შეთანხმებას, მე დავრჩები მინისტრის თანამდებობაზე”, - განაცხადა თეა წულუკიანმა.

მისივე თქმით, დისკუსიები აძლევს საფუძველს, ჰქონდეს იმედი, რომ მისი პოზიცია გაზიარებული იქნება. „ვნახოთ, როგორ განვითარდება დღეს მოვლენები“, - აღნიშნა მინისტრმა.

„თუკი ჩემი პოზიცია არ იქნება გაზიარებული, ჩემს ადგილს ვხედავ მხოლოდ ერთადერთ გუნდში, მას ჰქვია კაკულიების გუნდი, ეს არის ჩემი მეუღლე და ჩემი შვილი. ამასთან, წულუკიანის თქმით, რა პოზიციაზეც არ უნდა იყოს, მისი პოლიტიკური ადგილი „ქართულ ოცნებასთანაა“ და ის ყოველთვის „ქართული ოცნების“ ამომრჩეველი იქნება.

„რაც შეეხება პოლიტიკურ ადგილს, ჩემი პოლიტიკური ადგილი არის და ყოველთვის იქნება „ქართულ ოცნებასთან“, რა პოზიციაზეც არ უნდა ვიყო. თუ არც ერთ პოზიციაზე არ ვიქნები, ისევ ვიქნები „ქართული ოცნების“ ამომრჩეველი და როგორც აქამდე ვიბრძოდი, მომავალშიც ვიბრძოლებ, რომ „ქართული ოცნება“ იყოს გამარჯვებული და არ დაბრუნდეს უბედურება, რომელსაც ჩვენ ერთად ვებრძოდით“, – განაცხადა თეა წულუკიანმა.

თეა წულუკიანმა გუშინ იუსტიციის მინისტრის თანამდებობის დატოვება არ გამორიცხა.მისი თქმით, რამდენიმე დღის წინ გაჩნდა თემა, რომელიც იუსტიციის სამინისტროს კომპეტენციის ფარგლებში გადასაწყვეტი საკითხია.  ამასთან, ვიცესპიკერმა გია ვოლსკიმ განაცხადა, რომ არსებული ინფორმაციით, საკითხი, რომელზეც თეა წულუკიანი საუბრობს, იუსტიციის სამინისტროდან პენიტენციური სამსახურის გასვლას უკავშირდება.