ქართული მარშის წევრებისა და ლადო სადღობელაშვილის პროცესი დღეს გაიმართება

თბილისის საქალაქო სასამართლოში ლადო სადღობელაშვილისა და "ქართული მარშის" წევრების სასამართლო პროცესი, რომელიც 13 სექტემბრისთვის გადაიდო, დღეს გაიმართება. 

ლადო სადღობელაშვილის ადვოკატმა ცირა ჯავახიშვილმა გუშინ განაცხადა, რომ კრიმინალური პოლიციის თანამშრომელმა სადღობელაშვილის დაკავების ოქმი გააყალბა.

ლადო სადღობელაშვილი 12 სექტემბერს აქციაზე ადმინისტრაციული წესით დააკავეს 166-ე და 173-ე მუხლების დარღვევისთვის, რაც პოლიციელის კანონიერი მოთხოვნისადმი დაუმორჩილებლობასა და წვრილმან ხულიგნობას გულისხმობს.

12 სექტემბერს ფონდ “ღია საზოგადოება საქართველოს “ ოფისთან  “ქართული მარშის“ წევრებმა აქცია მოულოდნელი გადაწყვეტილებით დაიწყეს - მათ სამართალდამცველებს მაშხალები დაუშინეს და “ქართული ოცნების“ მერობის კანდიდატის - კახა კალაძის შტაბისკენ დაიძრნენ.

მოძრაობა “ქართულმა მარშმა“ 11 სექტემბერს რადიკალური და გრძელვადიანი აქციები დააანონსა და საქართველოს ხელისუფლებას მოუწოდა, რომ მიწა უცხოელებზე არ გაყიდოს. 

15 ივნისს პარლამენტმა სასოფლო-სამეურნეო მიწის უცხო ქვეყნის მოქალაქეზე გასხვისებაზე მორატორიუმი პირველი მოსმენით მიიღო. მორატორიუმს მხარი არ დაუჭირა „ნაციონალურმა მოძრაობამ“ და „ევროპულმა საქართველომ“.

6 სექტემბერს ცნობილი გახდა, რომ სასოფლო-სამეურნეო დანიშნულების მიწის შეძენასთან დაკავშირებით კანონით დადგენილი შეზღუდვა კომერციულ ბანკებზე არ გავრცელდება. ეს შეზღუდვა ასევე არ გავრცელდება განსკუთრებულ შემთხვევებზე, რომლებიც მთავრობის გადაწყვეტილებით განისაზღვრება.