სუსში „კანვას საქართველოს“ დირექტორის გამოკითხვა დასრულდა

სუსში მიმდინარე გამოძიების ფარგლებში სასამართლოს წინაშე „კანვას საქართველოს“ დირექტორი გამოიკითხა. გიორგი მელაძის მისამართით კითხვები ძირითადად, „კანვასის“ ფარგლებში მის საქმიანობას და ტრენინგებს შეეხებოდა.

სუსის გამომძიებლის მოთხოვნის მიუხედავად, მელაძემ და მისმა უფლებადამცველმა გაუთქმელობის დოკუმენტს ხელი არ მოაწერეს. მათი თქმით, ეს პროტესტის ერთგვარი ფორმაა. გამოკითხვიდან გამოსულმა მელაძემ თქვა, რომ სუსის წინააღმდეგ სასამართლოში დავას აპირებს.

„მე მჯერა ამ ქვეყანაში დემოკრატიული ცვლილებების, დემოკრატიული პროცესის და ნებისმიერი მოძრაობა და ნაბიჯი სახელმწიფოს მხრიდან, რომელიც შეეცდება, რომ ჩემი ეს მოქმედება წარმოუდგინოს სახელმწიფოს, როგორც ღალატი ან რაიმე სხვა ბოროტება, იქნება ჩემთვის შეურაცხმყოფელი. ეს ლექციები არის არაძალადობრივი სტრატეგიული კამპანიების დაგეგმვა როგორ ხდება, რა არის გასათვალისწინებელი ამ პროცესში, როგორ იყოს ეს ყველაფერი ეფექტური, მათ შორის მოძალადე სახელმწიფოების პირობებში“, - განუცხადა მელაძემ ჟურნალისტებს.

„კანვას საქართველოს“ დირექტორის მხარდასაჭერად სასამართლოსთან „ნაციონალური მოძრაობისა“ და „ევროპული საქართველოს“ წარმომადგენლები მივიდნენ. მათი თქმით, არასამთავრობო ორგანიზაცია „კანვასი“ ქვეყნის დემოკრატიულ პროცესს უწყობს ხელს.

18 სექტემბერს სახელმწიფო უსაფრთხოების სამსახურმა გაავრცელა განცხადება, სადაც ნათქვამი იყო, რომ გარკვეული პირები საქართველოში სამოქალაქო არეულობას გეგმავენ, რომლის მიზანია, ხელისუფლების ძალადობრივი გზით შეცვლა და „ევრომაიდნის“ მოწყობა. კერძოდ, დესტრუქციული პროცესების დაწყების პერიოდად ოქტომბერ-დეკემბრი სახელდება, მთავარი შემსრულებლები კი გიორგი ლორთქიფანიძე, მიხეილ ბატურინი და მამუკა მამულაშვილი არიან. გეგმის განხორციელება უცხო ქვეყნების კოორდინაციითა და ფინანსური მხარდაჭერით არის დაგეგმილი.

მოგვიანებით, სახელმწიფო უსაფრთხოების სამსახურში სამოქალაქო არეულობის სავარაუდო დაგეგმვის საქმესთან დაკავშირებით მიმდინარე გამოძიების ფარგლებში, ჯგუფ „კანვასის“ სამი წევრი, სერბეთის მოქალაქეები გამოკითხეს. გამოძიების ფარგლებში ასევე გამოიკითხა „კანვას - საქართველოს“ ერთ-ერთი დამფუძნებელი ნინო გოგიბერიძე.