ზალკალიანმა პომპეოს გზავნილები განმარტა

საგარეო საქმეთა მინისტრი დავით ზალკალიანი განმარტავს, რას გულისხმობდა აშშ-ის სახელმწიფო მდივანი მაიკ პომპეო, როდესაც პრემიერმინისტრ მამუკა ბახტაძესთან ერთად გამართულ პრესკონფერენციაზე ანაკლიის პორტთან დაკავშირებით გააკეთა განცხადება.

მინისტრის თქმით, მაიკ პომპეომ „ხაზი გაუსვა ანაკლიის პორტის მნიშვნელობას“. ზალკალიანმა უარყო რაიმე სახის კავშირი სახელმწიფო დეპარტამენტში გაკეთებულ განცხადებასა და კონსორციუმისთვის ვალდებულებების შესრულების გადავადებას შორის. 

ამის შესახებ ვაშინგტონში მყოფმა მინისტრმა ჟურნალისტებს შესაბამისი კითხვის საპასუხოდ განუცხადა. 
 
„კონკრეტული ფაქტები ადასტურებს იმას, რომ საქართველოს ხელისუფლება ამ მიმართულებით აქტიურ ნაბიჯებს დგამს. რამდენჯერ გადავადდა კონსორციუმის მხრიდან იმ ვალდებულებების შესრულება, რაც დაკავშირებულია ფინანსურად ამ პროექტის დახურვასთან?! გუშინ კიდევ ერთხელ მოხდა ვალდებულების გადავადება.

შესაბამისად, მცდარია იმის დაკავშირება, რომ გადავადებები მოხდა გუშინდელი განცხადების მერე. საქართველოს ხელისუფლების მხრიდან ბევრჯერ პრაქტიკულად დადასტურდა ამ პროექტის მნიშვნელობა, იგივე 300 მილიონი გამოიყო ინფრასტრუქტურის და მიწების შესყიდვაზე, რაც ადასტურებს ამ პროექტის მნიშვნელობას ჩვენთვის. სახელმწიფო მდივანმაც საკუთარ გამოსვლაში სწორედ ამას გაუსვა ხაზი“, - განაცხადა დავით ზალკალიანმა.

მისივე თქმით, ანაკლიის პროექტის პრიორიტეტულობას ადასტურებს ის ფაქტიც, რომ საქართველოს ხელისუფლებამ წარადგინა ევროკავშირში პრიორიტეტული პროექტების ნუსხაში და ასევე პროექტი ჩადებულია ქვეყნის საგარეო პოლიტიკის სტრატეგიაში.

ზალკალიანის თქმით, სახელმწიფო მდივანთან გამართულ დახურულ შეხვედრაზეც საქართველოს მიერ გატარებულ რეფორმებს მაღალი შეფასება მისცეს.

„სახელმწიფო მდივანთან შეხვედრაზე ამ დემოკრატიულ რეფორმებზე საუბარი იყო მხოლოდ პოზიტიურ კონტექსტში. მან ძალიან კარგად მიიღო ის მიმდინარე რეფორმები რომელსაც საქართველოს ხელისუფლება ამ მხრივ ახორციელებს, მათ შორის მართლმსაჯულების რეფორმის მეოთხე ტალღა. ხელისუფლების მხრიდან არის პოლიტიკური ნება გამოხატული, რაც ძალიან კარგად ესმით პარტნიორებს.

მინდა განსაკუთრებული ყურადღება მიაქციოთ იმას, თუ რა თქვა პრესკონფერენციაზე სახელმწიფო მდივანმა და არა იმას, როგორ ინტერპრეტაციას უკეთებენ მის გამონათქვამს სხვადასხვა პოლიტიკური ძალები.

აქ საქმე ეხება ეროვნულ ინტერესებს და და როდესაც სახელმწიფო მდივანი საუბრობს, რომ იგი მიესალმება რეფორმების გაგრძელებას, რომელსაც ვახორციელებთ, ეს რეფორმები მისთვის მისაღები რომ არ იყოს, არც მიესალმებოდნენ. ამიტომ, გთხოვთ საზოგადოებას ნუ შეიყვანთ შეცდომაში“, - განუცხადა ჟურნალისტებს დავით ზალკალიანმა.