„ქართული ოცნება" „პროპორციული არჩევნები 2020“-ის პრეზენტაციას მართავს

„ქართული ოცნება „პროპორციული არჩევნები 2020“-ის პრეზენტაციას მართავს. საკონსტიტუციო ინიციატივა მომავალი წლის საპარლამენტო არჩევნების პროპორციული სისტემით, ნულოვანი საარჩევნო ბარიერის პირობებში ჩატარებას გულისხმობს.  

პრეზენტაცია პარლამენტის ყოფილმა თავმჯდომარემ ირაკლი კობახიძემ წარადგინა.

“კანონპროექტი, რომელიც უკვე ინიცირებულია საქართველოს პარლამენტში, არის ლაკონიური. კანონპროექტს ხელს აწერს ასამდე დეპუტატი საპარლამენტო უმრავლესობიდან.

ამ კანონპროექტის მიღება საჭიროებს კონსენსუსს პოლიტიკური პარტიებს შორის და ჩვენ გვაქვს იმედი და ვართ მოწოდებული, რომ ხელი შევუწყოთ ამ კონსენსუსის ჩამოყალიბებას საქართველოს პარლამენტში“, - თქვა ირაკლი კობახიძემ.  

შეკრებილებს სიტყვით მიმართა მმართველი პარტიის გენერალურმა მდივანმა, თბილისის მერმა კახა კალაძემ.

„ეს არის პრინციპული პოლიტიკური ინიციატივა, რომელიც ფუნდამენტურ ცვლილებას შეიტანს საქართველოში პოლიტიკური სისტემისა და პოლიტიკური კულტურის განვითარებაში. როგორც უკვე აღვნიშნე, პროპორციული საარჩევნო სისტემის პირობებში, პოლიტიკური სისტემის გამართული ფუნქციონირება განსაკუთრებით მაღალ პოლიტიკურ კულტურას, პოლიტიკურ პარტიებს შორის კონსტრუქციულ დამოკიდებულებას და ეროვნული მიზნების გარშემო პოლიტიკური სისტემის კონსოლიდაციას მოითხოვს.

შესაბამისად, მინდა ვთხოვო ყველა პოლიტიკურ სუბიექტს, რომ ამ მიდგომით გააგრძელონ თავიანთი პოლიტიკური საქმიანობა. ამისთვის არსებობს შესაბამისი პლატფორმა და ჩვენ მზად ვართ დეტალურად განვიხილოთ ყველა ეს საკითხი და ნიუანსი“, - თქვა კახა კალაძემ. 

შეხვედრას საპარლამენტო და არასაპარლამენტო ოპოზიციის დიდი ნაწილი არ ესწრება. კონსულტაციებში ჩართვაზე პოლიტიკურ ჯგუფებს განსხვავებული პოზიცია აქვთ.

„პროპორციულ სისტემაზე გადასვლა თავისი არსით გამოწვევაა. ეს საჭიროებს პოლიტიკური სისტემის მუდმივ განვითარებას. ეს არის პასუხისმგებლობა, რომელიც ყველა ჩვენგანმა უნდა აიღოს. 

„ნაციონალური მოძრაობა“ და მასთან გაერთიანებული პარტიები, ასევე „ევროპული საქართველო“ საარჩევნო სისტემაზე „ქართულ ოცნებასთან“ სასაუბროდ აღარ მივლენ.

მანამდე სხვადასხვა მედიასაშუალებაში, მათ შორის „იმედისთვის“ მიცემულ ინტერვიუებში ოპოზიციის წარმომადგენლები პირდაპირ აცხადებდნენ, რომ მზად იყვნენ, შეხვედრაზე მისულიყვნენ და განხილვებში მონაწილეობა მიეღოთ.

თუმცა მოგვიანებით გამართულ ბრიფინგზე ცნობილი გახდა, რომ არასაპარლამენტო და საპარლამენტო ოპოზიციის დიდი ნაწილი არ აპირებს შეხვედრაში მონაწილეობას.

ნულოვანი ბარიერით პროპორციულ საარჩევნო სისტემაზე გადასვლის შესახებ საკონსტიტუციო ცვლილებები უკვე ინიცირებულია. დოკუმენტს უმრავლესობის 80 დეპუტატი აწერს ხელს.

პარტია „ქართული ოცნების“ თავმჯდომარე ბიძინა ივანიშვილი გამოდის ინიციატივით, რომ 2020 წლის საპარლამენტო არჩევნები პროპორციული სისტემით, ნულოვანი ბარიერის პირობებში ჩატარდეს. აღნიშნული განცხადება ივანიშვილმა 24 ივნისს გამართულ საგანგებო ბრიფინგზე გააკეთა.