ნოდარ მელაძე სამსახურიდან გაათავისუფლეს

„რუსთავი 2“-ის საინფორმაციო სამსახურის უფროსი ნოდარ მელაძე სამსახურიდან გაათავისუფლეს. ამის შესახებ არხის გენერალურმა დირექტორმა პაატა სალიამ ბრიფინგზე განაცხადა. 

სალია იმედოვნებს, რომ არხზე მყოფი პროფესიონალი ჟურნალისტები მუშაობას განაგრძობენ. მას არ სჯერა, რომ სარედაქციო პოლიტიკის გარანტი მხოლოდ ერთი ადამიანი შეიძლება იყოს. 

პაატა სალიას თქმით, იგეგმება კიდევ რამდენიმე ადამიანის გათავისუფლება. „რუსთავი 2“-ის გენერალურმა  დირექტორმა ასეთ თანამშრომლებს შორის ეკა კვესიტაძე, ნანუკა ჟორჟოლიანი, გიორგი გაბუნია და გიორგი ლაფერაშვილი დაასახელა. 

სალიას განმარტებით, მათ შესახებ გადაწყვეტილება შვებულებიდან დაბრუნების შემდეგ იქნება მიღებული. 

„რუსთავი 2“-ის გენერალური დირექტორის განცხადებით, მიღებულია შესაბამისი გადაწყვეტილება იმ ადამიანებზე, ვინც ახლა შვებულებაშია და აკეთებენ უპასუხისმგებლო განცხადებებს, რომ თურმე სხვა არხის დაფუძნებაში მონაწილეობენ, რაც ხელშეკრულებით აკრძალულია.

„ეკა კვესიტაძემ განაცხადა, რომ ის და მისი გუნდი გვარამიასთან ერთად აკეთებს ახალ ტელევიზიას. როგორ შეიძლება, ორ არხზე მუშაობდეს ერთდროულად?!“, - აღნიშნა სალიამ. 

„ინტერესთა კონფლიქტი გამოიხატა იმაში, რომ ჩვენი შეფასებით, დადებულია თვალთმაქცური გარიგებები, სარეკლამო კომპანიასთან, ამ შემთხვევაში ინტერმედია პლუსთან, ის მოგება, რომელიც უნდა მიეღო სამაუწყებლო კომპანია „რუსთავი2“-ს, მოხვდა სხვა კომპანიაში, სხვა კომპანიიდან იყო დარიგებული კონკრეტულ პირებზე, არ ვიცი საჩუქრის სახით, არ ვიცი, რა სახით, რის შედეგადაც შეძენილია უძრავი ქონება პრესტიჟულ სახლებში.

არხზე მომუშავე ჟურნალისტები თვლიან, რომ ბრძოლის რეჟიმში არიან ჩვენთან და ისეთ ვითარებაში, როდესაც არსებობენ ადამიანები, რომლებიც დავალებული არიან სხვასთან, მიღებული აქვთ ფინანსური სარგებელი, ვერ იქნებიან ამ არხის ერთგული და ჩვენი ამოცანაა, ეს გუნდი იყოს ერთიანი, კრიტიკული“, - განაცხადა პაატა სალიამ. 

ამასთან, „რუსთავი 2“-ის გენერალური დირექტორი ადასტურებს, რომ ნინო შუბლაძე ერთ-ერთია, ვისი კანდიდატურაც საინფორმაციო სამსახურის უფროსის თანამდებობაზე განიხილება. სალიას განმარტებით, ამ ეტაპზე გადაწყვეტილება მიღებული არ არის და საუბარი აღნიშნულ საკითხთან დაკავშირებით შეიძლება ბევრ ადამიანთან იყოს.

არხის გენერალური დირექტორის ბრიფინგის დასრულების შემდეგ ჟურნალისტებთან კომენტარი ნოდარ მელაძემაც გააკეთა. 

„დღეს პაატა სალიამ დამიბარა და მითხრა, ბრიფინგამდე რამდენიმე წუთით ადრე, რომ მე ვარ გათავისუფლებული სამსახურიდან და ეს არის ქიბარ ხალვაშის გადაწყვეტილება. ეს არ იყო, რა თქმა უნდა, დღეს მიღებული გადაწყვეტილება, უბრალოდ ისინი ეძებდნენ საბაბს და ძალიან ინტენსიურად, რომ მიეღოთ ჩემი სამსახურიდან გათავისუფლების გადაწყვეტილება, თუმცა, ძალიან გაუჭირდათ ამ საბაბის მოძებნა," - განაცხადა მელაძემ.

მისივე განცხადებით, ქიბარ ხალვაშის სახელზე ტელევიზიის გადაფორმებიდან ორ კვირაში მას „ქართული ოცნების“ თავმჯდომარე ბიძინა ივანიშვილთან დაახლოებული პირის ნდობით აღჭურვილი წარმომადგენელი შეხვდა და თანამშრომლობა შეთავაზა, რაზეც მან უარი უთხრა.

19 აგვიტოს ცნობილი გახდა, რომ ქიბარ ხალვაში „რუსთავი 2“-ს აღარ ყიდის. 12 აგვისტოს ბიზნესმენმა განცხადება გაავრცელა, რომელშიც წერდა, რომ ის „რუსთავი 2“-ს ყიდის.

18 ივლისს ბიზნესმენმა ქიბარ ხალვაშმა ტელეკომპანიის გენერალურ დირექტორად პაატა სალია დანიშნა, რომელმაც ამ პოზიციაზე ნიკა გვარამია შეცვალა. მანამდე სტრასბურგის სასამართლომ გააუქმა საქართველოს უზენაესი სასამართლოს გადაწყვეტილების აღსრულების შემაჩერებელი მექანიზმი.

კერძოდ, 2017 წლის 2 მარტს საქართველოს უზენაესი სასამართლოს დიდმა პალატამ ტელეკომპანია „რუსთავი 2“ ქიბარ ხალვაშს მიაკუთვნა. იმავე წლის 3 მარტს კი, „რუსთავი 2“-ის მიმართვის საფუძველზე, სტრასბურგის სასამართლომ უზენაესი სასამართლოს გადაწყვეტილების აღსრულება შეაჩერა. სწორედ ამ აღსრულების შეჩერება გააუქმა სტრასბურგის სასამართლომ.

საქართველოს გენერალურმა პროკურატურამ „რუსთავი 2“-ის ყოფილი გენერალური დირექტორის ნიკა გვარამიას საქმეზე თბილისის საქალაქო სასამართლოს აღკვეთის ღონისძიების შეფარდების შუამდგომლობით 10 აგვისტოს  მიმართა. 

გვარამიას ბრალი 9 აგვისტოს წაუყენეს. გამოძიების მტკიცებით, ნიკა გვარამიას მიერ საწარმოს ხელმძღვანელობითი და წარმომადგენლობითი უფლებამოსილების ბოროტად გამოყენებით ,,სამაუწყებლო კომპანია რუსთავი 2“-მა ვერ მიიღო 6 763 510 ლარი, რითაც საწარმოს დიდი ოდენობით ზიანი მიადგა.

პროკურატურიდან გამოსვლის შემდეგ გვარამიამ ბრალის დადგენილება საჯაროდ დახია. „რუსთავი 2“-ის ყოფილი გენერალური დირექტორი მოწმის სტატუსით საქალაქო სასამართლოში 2 აგვისტოს დაკითხეს.

17 აგვისტოს ცნობილი გახდა, რომ ნიკა გვარამიამ ახალი არხი დააფუძნა.