ეუთოს ოფისი უზენაესის მოსამართლეთა ნომინირებისა და დანიშვნის პროცედურას აკრიტიკებს

საქართველოში უზენაესი სასამართლოს მოსამართლეთა ნომინირებისა და დანიშვნის პროცედურა ნაკლოვანებებით ხასიათდებოდა, - წერს „ინტერპრესნიუსი“ ეუთოს დემოკრატიული ინსტიტუტებისა და ადამიანის უფლებათა ოფისის (ODIHR)-ის ანგარიშზე დაყრდნობით. 

კერძოდ, ანგარიშში აღნიშნულია, რომ საქართველოში უზენაესი სასამართლოს მოსამართლეთა ნომინირებისა და დანიშვნის პროცესის გამჭვირვალობა და ანგარიშვალდებულება არ იყო შესაბამისად უზრუნველყოფილი. ასევე, ანგარიშმა გამოავლინა ნომინირების პროცესში სხვადასხვა ნაკლოვანება. მათ შორის, ნათქვამია, რომ გასაუბრების ადგილმდებარეობაც არ იძლეობდა პროცესზე დაკვირვებისა და ანგარიშის წარმოდგენის შესაძლებლობას, რაც, საბოლოო ჯამში, არათანაბარ გარემოსა და პროცესის შეზღუდულ გამჭვირვალობას გულისხმობს. 

„ODIHR-ის წინა სამართლებრივი დასკვნა მიესალმება ღია დანიშვნის წესის პროცედურის შემოღებას და პარლამენტის ძალისხმევას გაწეროს შერჩევის კრიტერიუმებისა და პროცედურების დებულება, არსებული უფსკრულის აღმოსაფხვრელად, თუმცა აგრეთვე დაფიქსირდა რამდენიმე არსებითი ხარვეზი, მათ შორის, შერჩევის პროცესში გამჭვირვალობის გარანტიების ნაკლებობა, რათა უზრუნველყოფილი იქნას შერჩევის პროცესის მიმდინარეობისას გადაწყვეტილებების უტყუარობა და ობიექტურობა“, - ნათქვამია დოკუმენტში.

საქართველოს პარლამენტის იურიდიულ კომიტეტში უზენაესი სასამართლოს მოსამართლეობის კანდიდატების საქართველოს კონსტიტუციისა და სხვა კანონის მოთხოვნებთან შესაბამისობის დადგენის მიზნით კომიტეტის სამუშაო ჯგუფი შეიქმნა. სამუშაო ჯგუფი 10 დღე იმუშავებს, მოსამართლეობის კანდიდატებთან გასაუბრებები კი 23 სექტემბერს დაიწყება. მესამე სექტორმა ჯგუფში ჩართვა მოითხოვა. 

პარლამენტს უზენაესი სასამართლოს მოსამართლეობის კანდიდატთა სია 7 სექტემბერს წარედგინა, მანამდე იუსტიციის უმაღლესმა საბჭომ პარლამენტში წარსადგენად უზენაესი სასამართლოს მოსამართლეობის 20 კანდიდატი შეარჩია.

უმაღლესმა საბჭომ უზენაესი სასამართლოს მოსამართლეობის მსურველ 50 კანდიდატთან გასაუბრება აგვისტოში დაასრულა.

საქართველოს პარლამენტში უზენაესი სასამართლოს მოსამართლეთა არჩევის პროცედურის შესახებ ვრცლად შეგიძლიათ ამ ბმულზე წაიკითხოთ.