„პატრიოტთა ალიანსმა“ ამერიკის საელჩოსთან მოთხოვნები წარადგინა

ამერიკის საელჩოსთან „პატრიოტთა ალიანსის“ აქცია დასრულდა. პარტიის ლიდერებმა პროტესტის მონაწილეებს მიმართეს. ირმა ინაშვილმა კიდევ ერთხელ გაიხსენა 10 სექტემბერს მომხდარი ინციდენტი და მოქალაქეებს იმ დღეს განვითარებული მოვლენების შესახებ უამბო.

პოლიტიკოსის განცხადებით, სასტუმრო „რუმსში“ შეკრებილი ორგანიზატორები ცდილობდნენ, წარმოეჩინათ, თითქოს ირმა ინაშვილი შლიდა ღონისძიებას.

ინაშვილის თქმით, „ყველაზე შემზარავი კი ის იყო, რომ კრამერმა და ბრაიზამ არაერთი ტყუილი თქვეს, უფრო მეტიც დევიდ კრამერი მას ხელით შეეხო, ანალოგიური ქმედება ჩაიდინა ღონისძიების ორგანიზატორმა ნინო ევგენიძემაც“.

„ნუ უჭერთ მხარს მწამებელ სააკაშვილს და ბოკერიას“, - ეს არის მთავარი მოთხოვნა, რომელიც ირმა ინაშვილმა ამერიკის საელჩოსთან დააფიქსირა. 

13 სექტემბერს „პატრიოტთა ალიანსმა“ მეთიუ ბრაიზასა და დევიდ კრამერს პროკურატურაში უჩივლა. 

ბრაიზას განცხადებას, რომ ინაშვილმა საერთაშორისო კონფერენციის მსვლელობისას ღონისძიების ერთ-ერთი ორგანიზატორი დაკაწრა, პოლიტიკოსი ცილისწამებად აფასებს. პოლიტიკოსის მოთხოვნას ამერიკელი დიპლომატი Imedinews-თან ინტერვიუს დროს გამოეხმაურა. 

„პატრიოტთა ალიანსი“ ამერიკელი ექსპერტის დევიდ კრამერის „პერსონა ნონ გრატად“ გამოცხადებასაც მოითხოვს.  

ამ მოთხოვნის საფუძვლად პოლიტიკოსი სასტუმრო „რუმსში“ მომხდარ ინციდენტს ასახელებს, როდესაც ამერიკელმა დაპირისპირებისას მას დაუყვირა და ინაშვილის თქმით, ხელითაც შეეხო. პოლიტიკოსმა ამერიკელი ექსპერტისგან ბოდიშის მოხდაც მოითხოვა. 

10 სექტემბერს, ირმა ინაშვილი სასტუმრო „რუმსში“, საერთაშორისო კონფერენციაზე სიტყვით გამოსვლის მოთხოვნით გამოჩნდა, თუმცა ის ამ ღონისძიებაზე მიწვეული არ ყოფილა, რასაც ხმაური მოჰყვა. მოგვიანებით, პოლიტიკოსმა კონფერენციის მონაწილეებისადმი მიმართვა მაინც მოახერხა და ღონისძიების ამერიკელ სტუმრებს ჰკითხა, არის თუ არა ადამიანების წამება დასავლური ღირებულება.

ინაშვილი დისკუსიის მონაწილეებისთვის იმის თქმას შეეცადა, რომ რასაც ბოკერია და სააკაშვილი „პატრიოტთა ალიანსზე“ ამბობენ, სიცრუეა და ისინი უცხოელ პარტნიორებზე მონოპოლიის შენარჩუნებას ცდილობენ.

დევიდ კრამერმა კი განმარტა, რომ არ იცოდა, ვინ იყო ქალი, რომელიც ძალიან უხეშობდა და შლიდა კონფერენციას. იმის უარსაყოფად, რომ თითქოს კრამერი ინაშვილს არ იცნობდა, „პატრიოტთა ალიანსის“ ლიდერმა პრესკონფერენციაზე წარმოადგინა კრამერთან ერთად გადაღებული ფოტო, რომელიც მისი თქმით, ვაშინგტონში, 2010 წელს გამართულ შეხვედრაზეა გადაღებული.