მარინა ეზუგბაია: მეოთხე პაციენტის მდგომარეობა უფრო მძიმეა, რადგან კლინიკურად მძიმე ფორმაა

მძიმე სიტუაციის პროგრესირება ჯერ-ჯერობით არ გამოვლენილა და მდგომარეობა სტაბილურია, - ამის შესახებ ინფექციური საავადმყოფოს სამედიცინო დირექტორმა, მარინა ეზუგბაიამ ჟურნალისტებს განუცხადა, რომელმაც კომენტარი გააკეთა კორონავირუსით ინფიცირებული მეოთხე პაციენტის ჯანმრთელობის მდგომარეობაზე.

მისივე თქმით, 44 წლის საქართველოს მოქალაქის მდგომარეობა სტაბილურად მძიმეა. იგი ინფექციურ საავადმყოფოში 4 მარტს, 13:00 საათისთვის შევიდა. პაციენტმა ცენტრს თავად მიმართა. იგი იტალიიდან 1-ელ მარტს ჩამოვიდა და ბინაზე თვითიზოლაციაში იმყოფებოდა.

„ერთ პაციენტზე დადასტურდა კორონავირუსი. ეს უკვე ჩვენს ცენტრში დაავადების მეოთხე შემთხვევაა. იმ სამი პაციენტისგან განსხვავებით, მეოთხე პაციენტის მდგომარეობა უფრო მძიმეა. ეს ნიშნავს, რომ კლინიკურად მძიმე ფორმაა. დაავადება გამოვლინდა ტემპერატურის მატებით, 38,5-39,5 გრადუსს შორის მერყეობდა და შედარებით მძიმე კლინიკით. შემთხვევა ლაბორატორიულად დადასტურებულია და მკურნალობა მიმდინარეობს. ამ დრომდე მდგომარეობა კვლავ მძიმე, თუმცა სტაბილურია“, - განაცხადა ეზუგბაიამ.

ცენტრის ხელმძღვანელმა იმედი გამოთქვა, რომ დაავადება მკურნალობას დაემორჩილება და სტაბილური სიტუაციის შემდეგ მდგომარეობის გაუმჯობესება დაიწყება.

ეზუგბაიამ ასევე ისაუბრა ინფექციურ საავადმყოფოში მოთავსებული დანარჩენი სამი პაციენტის მდგომარეობაზეც. მისივე თქმით, ამ პაციენტების მდგომარეობა სტაბილურია და დაავადება არ პროგრესირებს.

საქართველოში დღეს კორონავირუსის მეოთხე შემთხვევა დაფიქსირდა. ინფიცირებული 44 წლის საქართველოს მოქალაქე კაცია, რომელიც იტალიიდან პირველ მარტს ჩამოვიდა. პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

კორონავირუსის მეორე შემთხვევა საქართველოში 2020 წლის 28 თებერვალს, მესამე კი 29 თებერვალს დადასტურდა. 4 მარტს კი ცნობილი გახდა, რომ ვირუსით იტალიაში მცხოვრები საქართველოს მოქალაქე დაინფიცირდა. ბოლო მონაცემებით, COVID-19-ს მსოფლიოს მასშტაბით 3220 ადამიანი ემსხვერპლა, 51,193 კი გამოჯანრთელდა.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.