ევროკავშირმა Brexit-ის ვადები 2020 წლის 31 იანვრამდე გაახანგრძლივა

ევროკავშირმა Brexit-ის ვადები 2020 წლის 31 იანვრამდე გაახანგრძლივა, ხოლო მხარეების მიერ ჯონსონი-იუნკერის შეთანხმების რატიფიცირების შემთხვევაში, დიდი ბრიტანეთი ევროკავშირის შემადგენლობიდან გასვლას 30 ნოემბერს და 31 დეკემბერსაც შეძლებს. ამის შესახებ წერს გამოცემა The Guardian-ი, რომელიც ბრიუსელში დღეს დამტკიცებული დოკუმენტის პროექტს გაეცნო.

„თუ მხარეები რატიფიცირების პროცედურებს 30 ნოემბრამდე ან 31 დეკემბრამდე დაასრულებენ, Brexit-ი ამ თარიღებში ამოქმედდება. წინააღმდეგ შემთხვევაში, ბოლო ვადა 2020 წლის 31 იანვარი იქნება“, - აღნიშნულია დოკუმენტში.

დიდი ბრიტანეთის პრემიერს, ბორის ჯონსონს, Brexit-ის გამო რიგგარეშე საპარლამენტო არჩევნების ჩატარება 12 დეკემბერს სურს, თუმცა, მოქმედი კანონმდებლობის თანახმად, ამისთვის მას დეპუტატების ორი მესამედის მხარდაჭერა სჭირდება, პრემიერის კონსერვატიულ პარტიას კი პარლამენტში უმცირესობა აქვს. ჯონსონს მიაჩნია, რომ რიგგარეშე არჩევნები ბრიტანეთის ევროკავშირიდან გასვლის უზრუნველყოფისთვის არის საჭირო. 

20 ოქტომბერს ბორის ჯონსონმა ევროკავშირს Brexit-ის გადავადების საკითხზე ოფიციალური მიმართვა გაუგზავნა, თუმცა, მასზე ხელი არ მოუწერია. კანონით გათვალისწინებულ მიმართვასთან ერთად ჯონსონმა ევროკავშირს წერილიც მისწერა, რომელშიც განაცხადა, რომ Brexit-ის გადავადება შეცდომა იქნებოდა. ევროკავშირმა Brexit-ის გადავადებას მხარი დაუჭირა.

Brexit-მა ბრიტანეთში პოლიტიკური კრიზისი გამოიწვია, რის გამოც პრემიერმინისტრი ტერეზა მეი გადადგა. დიდი ბრიტანეთის ევროკავშირიდან გასვლის შესახებ ვრცელი სტატია წაიკითხეთ ამ ბმულზე.