ხაზარაძე: გახარია ანაკლიის განვითარების გეგმას მინისტრის რანგში ეწინააღმდეგებოდა

გიორგი გახარია იყო ადამიანი, რომელიც მინისტრის რანგში ანაკლიის განვითარების გეგმას ეწინააღმდეგებოდა და ეს უცხოელ დიპლომატებთანაც არაერთხელ უთქვამს, - ამის შესახებ „თიბისი ბანკისა“ და საზოგადოებრივი მოძრაობა „ლელოს“ დამფუძნებელმა მამუკა ხაზარაძემ „კვირის პალიტრასთან“ ინტერვიუში განაცხადა.

„როდესაც მინისტრი ხარ და ასეთი მნიშვნელობის პროექტს არ აჩქარებ, თუნდაც იმიტომ, რომ დაასწრო შენს კონკურენტს და შენი ქვეყნის ოკუპანტ ქვეყანას, რომელიც ყოველ კვირას 100 მეტრ მიწას გაჭრის, სხვა ვერსია არ არსებობს. ეკონომიკურად მართლაც გაუმართლებელი პროექტიც რომ იყოს (და ეს ასე არ არის), აფხაზეთის გვერდზე ამხელა ინფრასტრუქტურის აშენებას სახელმწიფო მნიშვნელობა რომ აქვს, დიდი დაფიქრება არ სჭირდება. მაშ, რა არის სახელმწიფოებრივი აზროვნება, თვალის პაჭუნი და „წერილი თუ სიხარულის“ ძებნა?!

ყველაფერი იქით მიდის, რომ კონტრაქტი გაგვიწყვიტონ. 12 სექტემბერს მაია ცქიტიშვილმა ჩვენი ინვესტორები, რომლებთან მოლაპარაკებაც თითქმის დასრულებულია, პრაქტიკულად, ოთახიდან გამოაგდო. კიდევ კარგი, მე და ბადრი ჯაფარიძე არ ვესწრებოდით იმ შეხვედრას, თორემ ჩვენ დაგვბრალდებოდა. ცქიტიშვილმა პირდაპირ უთხრა, თქვენნაირი ინვესტორი არ გვჭირდებაო. ინგლისისა და ჰონგ-კონგის წარმომადგენლები იყვნენ. მეტ დეტალზე ამ ეტაპზე ვერ ვისაუბრებ“, - განაცხადა მამუკა ხაზარაძემ.

მამუკა ხაზარაძემ ინტერვიუში ვანო ჩხარტიშვილის შესახებაც გააკეთა კომენტარი და აღნიშნა, რომ „მის პასკვილებზე პასუხის გაცემას არ აპირებს“.

„ჩხარტიშვილის პასკვილებზე პასუხის გაცემას არ ვაპირებ. ყველას შეუძლია გაარკვიოს, რამდენ კომპანიასთან ჰქონდა დავა, ვინ იყო მოსამართლე, რომელთანაც ყველა საქმე მიდიოდა. ასევე, გაარკვიონ, რა დავა ჰქონდა ჩხარტიშვილს ბადრი პატარკაციშვილის ოჯახთან, რომელსაც მეგობრობას ეფიცებოდა და ვიცით, როგორც დასრულდა ყველაფერი. არ მინდა სიღრმეებში წასვლა, მაგრამ ვინმეს სჯერა, რომ ჩხარტიშვილს 30 მილიონი ეკუთვნოდა და რადგან უცებ ბიძინა ივანიშვილთან ერთად ქვეყნის ეკონომიკურ სტაბილურობაზე დაფიქრდა, ეს თანხა ვინმეს აჩუქა?

ვინმეს სჯერა, რომ ჩხარტიშვილის ნაამბობი მართალია, რომელიც ბიძინა ივანიშვილთან ერთად სახელმწიფოებრივ საქმეებს პროკურორის თანდასწრებით არჩევს? როდესაც ორი კაცის შერიგება გინდა და შეხვედრაზე პროკურორს ახვედრებ, ამას კაცურადაც ცუდი სახელი ჰქვია. სჯობს, სიღრმეებში არ ჩავიდნენ და აქ გაჩერდნენ, თორემ გადაიჩეხებიან“, - განაცხადა ხაზარაძემ.

საქართველოს პრემიერმინისტრმა გიორგი გახარიამ მამუკა ხაზარაძის აღნიშნულ ბრალდებას ჟურნალისტებთან უპასუხა. მისი თქმით, ხაზარაძემ ბრალდებების დამადასტურებელი მტკიცებულებები უნდა წარმოადგინოს.

„ბატონი ხაზარაძე განსაკუთრებით ბოლო დროს ბევრ საოცარ რამეს ამბობს. საუბრობს წერილზე, ოქმზე და კიდევ ბევრ რაღაცაზე. მოიტანოს, გვაჩვენოს ეს ოქმი. ანაკლიის პროექტთან დაკავშირებით ყოველთვის ვამბობდი, რომ პროექტის წარმატებით განხორციელებისთვის მას სჭირდება პასუხისმგებლიანი და სერიოზული ინვესტორები. რაც შეეხება ვიღაცის ინტერესებს, ჩვენ ვამბობთ, რომ სახელმწიფო ყველა ვალდებულებას ასრულებდა და შეასრულებს. ანაკლიას, ღრმაწყლოვან პორტს სჭირდება პასუხისმგებლიანი, სეროზული კერძო ინვესტორები, რომელიც, სამწუხაროდ, არ გვყავს. ეს არის ანაკლიის ღრმაწყლოვანი პორტის პრობლემა. სახელმწიფო მას უჭერდა და დაუჭერს მხარს. რაც შეეხება ვიღაცის ინტერესებს, კონსორციუმის ბოლო ქმედებების შედეგად არც ერთი სერიოზული უცხოელი, მათ შორის ჩვენთვის ძალზე მნიშვნელოვანი ამერიკელი პარტნიორი კონსორციუმში ფაქტობრივად არ დარჩა და როცა ამის შემდეგ კიდევ ვიღაცას რაღაც ინტერესებს აბრალებენ, არასერიოზულია“, - აღნიშნა პრემიერმა. 

მანამდე, ვანო ჩხარტიშვილმა თავის განცხადებაში მამუკა ხაზარაძე სიცრუის გავრცელებაში დაადანაშაულა.

მამუკა ხაზარაძემ საზოგადოებრივი მოძრაობა „ლელოს“ პრეზენტაცია 12 სექტემბერს, ანაკლიაში გამართა. რაც შეეხება პარტიის დაფუძნებას, ამას ის და ბადრი ჯაფარიძე ოქტომბერში გეგმავენ. 

„თიბისი“ ბანკის დამფუძნებლებს, მამუკა ხაზარაძეს და ბადრი ჯაფარიძეს 2019 წლის 24 ივლისს ბრალი წარედგინათ ჯგუფურად, 16 664 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება. საქმე ეხება 2008 წლის ფინანსურ ოპერაციას.   

26 ივლისს სასამართლომ ბიზნესმენებს აღკვეთის ღონისძიების სახით თითოეულს 700 000 ლარიანი გირაო შეუფარდა (პროკურატურა მილიონიან გირაოს მოითხოვდა). ამავე დღეს ცნობილი გახდა, რომ „თიბისი ბანკის საქმეზე“ დაწყებული გამოძიების გამო, ბადრი ჯაფარიძემ და მამუკა ხაზარაძემ ანაკლიის მმართველი საბჭოს თავმჯდომარისა და თავმჯდომარის მოადგილის თანამდებობის დატოვების გადაწყვეტილებაც მიიღეს. მანამდე ისინი „თიბისი ბანკის“ მართვასაც ჩამოშორდნენ.