ციხელაშვილი: ცხინვალის რეგიონი საპყრობილეს ემსგავსება

შერიგებისა და სამოქალაქო საკითხებში სახელმწიფო მინისტრი იმედოვნებს, რომ ექიმ ვაჟა გაფრინდაშვილს საპყრობილიდან უახლოეს მომავალში გაათავისუფლებენ. 

ქეთევან ციხელაშვილი აცხადებს, რომ ტრაგიკულია, როდესაც მთლიანად ცხინვალის რეგიონი საპყრობილეს და იზოლატორს ემსგავსება, ეს კი იმ პირობებში, როდესაც გადასასვლელებიც ჩაკეტილია.

მინისტრს იმედი აქვს, რომ „ამ საქმის მონაწილეები გააცნობიერებენ, რა სიმძიმის ქმედებასთან გვაქვს საქმე და დაუყოვნებლივ გათავისუფლდება უკანონოდ დაკავებული ექიმი. ასევე აღდგება ქართველებისთვის და ოსებისთვის სასიცოცხლოდ მნიშვნელოვანი მიმოსვლა“. 

„გაფრინდაშვილის დაკავების დღიდან მთავარი პრიორიტეტი უკანონო ტყვეობიდან მისი დახსნაა. ყველა სახელმწიფო სტრუქტურა, ასევე ფორმალური და არაფორმალური არხი ჩართულია. თავისთავად ყველა დაკავება არის უმძიმესი ფაქტი, მით უმეტეს ექიმის, რომელიც თავად მკურნალობს ოსს, აფხაზს და სხვა ეროვნების წარმომადგენელს.

ვიცი, რომ ბევრი ოსისთვის ეს არის ღირსების შემლახველი, რადგან ეს დაცლილია ადამიანის, ჰუმანურობის პრინციპებისგან და რაიმე რაციონალიზმისგან. წარმოუდგენელია, რომ ადამიანი ამდენი ხნის განმავლობაში იმყოფება უკანონო პატიმრობაში“, - აღნიშნა მინისტრმა. 

16 ნოემბერს, აშშ-ის საელჩომ ვაჟა გაფრინდაშვილის დაუყოვნებლივ გათავისუფლება მოითხოვა.

რაც შეეხება ხელისუფლების რეაგირებას, ექიმის დაკავების საკითხს განცხადებები მოჰყვა საგარეო საქმეთა და ჯანდაცვის სამინისტროებში. პარლამენტის თავმჯდომარემ, არჩილ თალაკვაძემ განაცხადა, რომ ექიმის დაპატიმრებით საოკუპაციო რეჟიმი ადამიანურ ღირებულებებს კიდევ ერთხელ გაემიჯნა.

ფაქტს გამოეხმაურა სახალხო დამცველიც. პრეზიდენტმა ზურაბიშვილმა კი საერთაშორისო ორგანიზაციებს მიმართა.

15 ნოემბერს ექიმ ვაჟა გაფრინდაშვილს ოკუპანტებმა ორთვიანი წინასწარი პატიმრობა შეუფარდეს. მას ე.წ. საზღვრის დარღვევას ედავებიან. დაკავებულის კოლეგების ინფორმაციით, ოკუპანტები და ოსი სეპარატისტები ექიმ ვაჟა გაფრინდაშვილისაგან ერთადერთ რამეს ითხოვენ: აღიაროს საზღვრის გადაკვეთა, რაზეც ის კატეგორიულ უარს აცხადებს. 

ორ თვეზე მეტია, გამშვები პუნქტის ჩაკეტვის გამო ახალგორის მოსახლეობას პრობლემები ექმნება. ტრაგიკული შემთხვევა სწორედ ამ შეზღუდვას მოჰყვა, როდესაც ადგილობრივები თბილისში სამკურნალოდ ჩასვლას ვერ ახერხებენ.

29 ოქტომბერს, ოკუპირებული ახალგორის სოფელ იკოთში მცხოვრები მარგო მარტიაშვილი, რომელიც სავარაუდოდ, ინსულტის დიაგნოზით ცხინვალის საავადმყოფოში გადაჰყავდათ, გზაში გარდაიცვალა, რაც ევროკავშირმა თავისუფალი გადაადგილების შეზღუდვის ტრაგიკული მაგალითად შეაფასა. 

გარდა ამ ფაქტისა, რამდენიმე დღის წინ ახალგორში 60 წლამდე ქალი ჭაში ჩავარდა. მძიმედ დაშავებულის ოჯახი ცხინვალის საავადმყოფოში მყოფი პაციენტის თბილისში სამკურნალოდ გადმოყვანას უშედეგოდ ითხოვს.

მას შემდეგ, რაც დეფაქტო ცხინვალმა ე.წ. გამშვები პუნქტი ჩაკეტა, პაციენტების მცხეთასა და თბილისში გადმოყვანა შეუძლებელი გახდა. მიზეზი ჩორჩანაში აგებული საგუშაგოა. საოკუპაციო ძალების წარმომადგენლები აცხადებენ, რომ ვიდრე ქართული მხარე ამ საგუშაგოს არ აიღებს, გზების გახსნას არ აპირებენ.

კრიზისების საკითხებში ევროკავშირის სპეციალურმა წარმომადგენელმა ტოვიო კლაარმა 13 ნოემბერს განცხადა, რომ თანათავმჯდომარეებთან ერთად მიმდინარეობს მუშაობა იმაზე, რომ წნელისი-ჩორჩანაში არსებული მდგომარეობა გამოსწორდეს და გადასასვლელები გაიხსნას.

საგარეო უწყება ახალგორში ე.წ. გამშვები პუნქტის გახსნის საკითხზე საერთაშორისო პარტნიორებთან მუშაობს. განცხადება გაავრცელეს ჟენევის დისკუსიების თანათავმჯდომარეებმაც, რასაც პრეზიდენტი ზურაბიშვილიც გამოეხმაურა.