ცნობილია ივანიშვილისა და უმრავლესობის დახურული შეხვედრის დეტალები

გასულ კვირაში პარტია "ქართული ოცნება - დემოკრატიული საქართველოს" ცენტრალურ ოფისში უმრავლესობის კონსულტაციები გაიმართა. შეხვედრების მთავარი თემა უზენაესი სასამართლოს მოსამართლეობის კანდიდატების შერჩევის კრიტერიუმებზე მსჯელობა იყო. შეხვედრების მოდერატორი პარტიის თავმჯდომარე ბიძინა ივანიშვილი იყო. 

"იმედის კვირის" ინფორმაციით, სანამ შეხვედრაზე ამ საკითხთან დაკავშირებით დაპირისპირებულ მხარეებს შორის აზრების გაცვლა დაიწყებოდა, მათ საკუთარი მოსაზრებები ბიძინა ივანიშვილმა გააცნო. 

2-დღიანი მოლაპარაკების შემდეგ დეპუტატები ჟურნალისტებთან საჯარო განცხადებებში ამ თემაზე არ საუბრობდნენ და არც "იმედის კვირას" დათანხმდნენ კამერის წინ ინტერვიუზე. ამ მოლაპარაკებების ფარგლებში უმრავლესობის დეპუტატებმა ბიძინა ივანიშვილისგან დოკუმენტი მიიღეს, რომლის გაცნობის შესაძლებლობაც "იმედის კვირას" წყაროებმა მისცეს.

ამავე წყაროებისგან გახდა ცნობილი, რომ მათ შეხვედრამდე ჰქონდათ საკმარისი დრო იმისთვის, რომ გაცნობოდნენ პარტიის თავმჯდომარის ხედვას და საკუთარი პოზიციაც მოემზადებინათ.

"იმედის კვირის" წყაროები ვერ ამბობენ, რომ პარტიის თავმჯდომარე ვინმეს მიმართ მიკერძოებული იყო, რადგან ივანიშვილმა მიმოიხილა ის პრობლემები, რაც სასამართლოს ჰქონდა და რა არჩევანის წინაშეც "ქართული ოცნების" ხელისუფლება 2012 წლის შემდეგ იდგა - გაეთავისუფლებინა სასამართლო სისტემა პოლიტიკური გავლენებისგან და ამით ახალი სტანდარტი დაემკვიდრებინა, თუ განეხორციელებინა "რეპრესიული წმენდა", რომლის გამოცდილებაც წარსულში უკვე არსებობდა.

უმრავლესობის დეპუტატების ინფორმაციით, ბიძინა ივანიშვილმა დააფიქსირა პოზიცია, რომ უვადო და თუნდაც ვადით გამწესებული მოსამართლეების სისტემიდან დათხოვნა მიუღებელი და უკანონოა, და მაინც თუ ასე მოიქცევა ხელისუფლება - ეს აუცილებლად იქნება მათი პოლიტიკური ოპონენტებისთვის ახალი შანსი, რომ ისევ შეძლონ სასამართლოზე გავლენის მოპოვება.

შეხვედრიდან გამოსულმა დეპუტატებმა "იმედის კვირას" უთხრეს, რომ პარტიის თავმჯდომარემ გუნდს ასევე ჰკითხა - იცოდნენ თუ არა, რომ უზენაესი სასამართლოს კანდიდატად წარდგენილი 10 მოსამართლიდან - 7 ისედაც უვადო მოსამართლეა სააპელაციო სასამართლოში; და რომ მიხეილ ჩინჩალაძე, რომელსაც დეპუტატთა ნაწილი კლანურ მმართველობაში ადანაშაულებდა თბილისის სააპელაციო სასამართლოს თავმჯდომარე და უვადოდ დანიშნული მოსამართლეა, შესაბამისად უზენაეს სასამართლოში 28-დან ერთ-ერთ მოსამართლედ გამწესება მათთვის დაწინაურება ვერ იქნებოდა.

დღეს სასამართლო რეფორმის სამუშაო ჯგუფის სამუშაო შეხვედრა გაიმართა, რომელიც იუსტიციის საბჭოს არამოსამართლე წევრებმა და ნაციონალურმა მოძრაობამ პროტესტის ნიშნად დატოვა. 

სასტუმრო „რედისონ ბლუ ივერიასთან“ მოსამართლეთა შესარჩევი სამუშაო ჯგუფის შეხვედრის პარალელურად მოქალაქეთა საინიციატივო ჯგუფის საპროტესტო აქცია გაიმართა. 

21 იანვარს უზენაესის მოსამართლეობის სადავო კანდიდატებმა მოსამართლეებად არჩევაზე უარი თქვეს. 24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

ამ საკითხთან დაკავშირებით ორი დღის განმავლობაში კონსულტაციები და შეხვედრები იმართებოდა უმრავლესობაში, რომელსაც პარტიის თავმჯდომარე ბიძინა ივანიშვილი ხელმძღვანელობდა.